Oficina de Reclamacións de Clientes das Caixas de Aforros

A Oficina de Reclamacións de Clientes das Caixas de Aforros é un órgano administrativo, dependente da dirección Xeral de Política Financeira e Tesouro da Consellería de Economía e Facenda.

A súa función é tramitar as queixas e reclamacións presentadas polos clientes das caixas de aforros operantes en Galicia.

Poderán ser obxecto de reclamación ou queixa operacións concretas nas que o cliente considere que a caixa de aforros incumpriu normas de disciplina ou non se axustou ás boas prácticas e usos bancarios.

Para formula-la reclamación é preciso o cumprimento das seguintes condicións:

1. Presentación previa da mesma reclamación ante o valedor do cliente da Federación Galega de Caixas de Aforros, e que este non contestara no prazo de dous meses ou informara negativamente, deberase xustificar documentalmente a dita presentación e, se é o caso, o informe desestimatorio emitido.
2. Declaración expresa de que os mesmos feitos non se atopan xa formulados ou resoltos noutra vía administrativa, xudicial ou arbitral.

O prazo para a presentación das reclamacións será de dous meses contados desde o día seguinte ó da notificación do informe desestimatorio do valedor ou unha vez transcorridos dous meses sen que este manifestara o seu criterio.

A reclamación formularase por escrito no formulario que ó efecto facilitarán as caixas de aforros, no cal se consignarán basicamente as seguintes circunstancias:

1. Datos identificativos da persoa física ou xurídica que formula a reclamación.
2. Denominación da caixa de aforros contra a que se presenta reclamación e oficinas onde se produciran os feitos obxecto de reclamación ou queixa.
3. Exposición dos feitos e razoamentos xustificativos da queixa ou reclamación.
4. Expresión concreta da declaración que se solicita da oficina.
5. Declaración expresa de que os mesmos feitos non foron obxecto de reclamación ou xa resoltos en vía administrativa, xudicial ou arbitral.

As queixas ou reclamacións dirixiranse á Oficina de Reclamacións do Cliente das Caixas de Aforros e presentaranse no Rexistro Xeral da Consellería de Economía e Facenda (Edif. Administrativo de San Caetano - 15704 Santiago de Compostela) ou de calquera das formas previstas no artigo 38 da lei 30/1992, do 26 de novembro.

1. Os que acrediten a representación do reclamante cando este actúe por representación.
2. Copia da queixa ou reclamación presentada ante o valedor do cliente, na que conste a data de presentación ou, de se-lo caso, data do informe desestimatorio emitido.
3. Os documentos que se consideren necesarios para acredita-los feitos obxecto da reclamación.

   Nota: Para facilita-la operación de reclamación existe un impreso que se pode descargar dende aquí, ou solicitándoo nas oficinas tanto da Consellería como das Caixas de Aforro.

• Se a reclamación non fose admitida a trámite, a oficina notificarallo ó interesado con indicación expresa das causas da inadmisión.
• Admitida a reclamación, tralos trámites procedementais necesarios, o expediente rematará mediante resolución do Director Xeral de Política Financeira e Tesouro na que declarará se existiu ou non quebrantamento das normas de disciplina ou das boas prácticas e usos bancarios.

A resolución que pon fin ó expediente de reclamación deberá dictarse no prazo de catro meses, contados desde a presentación da reclamación. Se transcorrido este prazo non recaese resolución expresa, entenderase que a reclamación foi desestimada por silencio administrativo negativo.