OBRIGAS DE INFORMACIÓN DAS CAIXAS DE AFORROS.

A normativa de transparencia e protección á clientela prevé determinadas obrigas de información por parte das Caixas de Aforros.

• TABOLEIRO PERMANENTE
• A DISPOSICIÓN DO CLIENTE
• INTERNET

TABOLEIRO PERMANENTE

En primeiro lugar, as entidades deben poñer a disposición dos seus clientes no taboleiro permanente, en todas e cada unha das súas oficinas abertas ó público, determinada información relativa a:

1. Reclamacións de clientes
   • existencia dun departamento ou servizo de atención ó cliente e, no seu caso, dun defensor do cliente, con indicación da súa dirección postal e electrónica,
   • obriga por parte da entidade de atender e resolver as queixas e reclamacións presentadas polos seus clientes no prazo de dous meses desde a súa presentación,
   • referencia ó Comisionado para a Defensa dos Clientes de Servizos Bancarios, con especificación da súa dirección postal e electrónica, e á necesidade de esgotar a vía do departamento ou servizo de atención ó cliente -ou do defensor do cliente, no seu caso- para poder formular as queixas e reclamacións ante aquel,
   • existencia do Valedor do Cliente, o seu enderezo e o procedemento a seguir para formular as queixas e reclamacións ante aquel. En particular, debe sinalarse o prazo de dous meses para resolver e informar de que a reclamación ante o Valedor do Cliente é un requisito previo necesario para poder reclamar posteriormente ante a Oficina de Reclamacións de Clientes das Caixas de Aforros da Xunta de Galicia,
   • existencia da Oficina de Reclamacións de Clientes da Xunta de Galicia, ante a que os clientes da caixa poden presentar as súas queixas e reclamacións previa reclamación ante o Valedor do Cliente, e que este non as admitise, as desestimase ou non resolvese nun prazo de dous meses desde a súa presentación.
2. Tipos de xuro, tipos de cambio, tarifas e comisións
   • declaración obrigatoria de tipos de operacións activas:
     1. Tipo de xuro preferencial.
     2. Tipos aplicables nos descubertos en conta corrente, facendo constar separadamente, no seu caso, os tipos aplicables ós descubertos en conta corrente con consumidores (Lei 7/1995 de crédito ó consumo)
     3. Tipos aplicables nos excedidos en conta de crédito, ou diferencial penalizador sobre o tipo de xuro pactado.
   • Tipos de referencia: correspondentes a outros apoios financeiros ou prazos que consideren como máis habituais ou representativos entre os que estean dispostos a conceder, e en particular os que afecten ó consumo e á adquisición hipotecaria de vivendas.
   • Existencia e dispoñibilidade dun folleto de tarifas e normas de valoración.
   • Modificacións do tipo de xuro, comisións ou gastos repercutibles, en contratos de duración indefinida.
   • Modificacións de tipos de xuro de títulos emitidos a tipo variable.
   • Referencia á existencia de tipos de cambio mínimos de compra e máximos de venda nas operacións de compravenda de divisas e de billetes, e ás comisións e gastos aplicables.
   • Tarifas sobre as operacións máis habituais que realice a entidade no mercado de valores.
   • Existencia e dispoñibilidade dun folleto informativo de tarifas, así como de determinados contratos-tipo.
3. Información sobre operacións concretas
   • Existencia do folleto informativo gratuíto sobre préstamos hipotecarios.
   • Referencia ó dereito dos clientes a solicitar as ofertas vinculantes sobre créditos ó consumo e préstamos hipotecarios, indicando expresamente o carácter gratuíto da súa entrega.
   • Referencia ó dereito dos clientes a obter unha oferta coas condicións específicas aplicables a unha orde de transferencia transfronteiriza.
   • Existencia e dispoñibilidade dos folletos de emisión e de ofertas públicas de venda correspondentes, cando a entidade estea encargada da colocación da emisión ou do servizo financeiro da mesma, e os folletos das instituci óns de inversión colectiva que comercialice a entidade.
4. Outras referencias
   • Referencia ás competencias da Comisión Nacional do Mercado de Valores e do Banco de España en materia de protección da clientela nos mercados de valores.
   • Referencia á normativa que regula a transparencia das operacións bancarias e a protección da clientela.

A DISPOSICIÓN DO CLIENTE

En segundo lugar, deben ter a disposición dos seus clientes o "Regulamento para a Defensa do Cliente" así como follas de reclamación ante o servizo ou departamento de atención ó cliente da Caixa (ou ante o defensor do cliente, no seu caso) e ante o Valedor do Cliente, que serán de entrega obrigatoria e gratuíta a petición do cliente.

Finalmente, debe existir de modo permanente e nun lugar destacado un cartel que resulte facilmente lexible coa seguinte lenda: Existen follas de reclamación ante o Valedor do Cliente da Federación Galega de Caixas de Aforros a disposición dos clientes.

INTERNET

As Entidades que ofrezan a posibilidade de realizar operacións a través de Internet, deberán incluír na dirección propia da Entidade, en posición suficientemente destacada:

• a súa denominación social completa e, no seu caso, nome comercial,
• o seu domicilio social completo,
• a súa natureza de Entidade de Crédito suxeita á supervisión do Banco de España,
• mención á súa inscrición no correspondente rexistro administrativo especial a cargo do Banco de España,
• todas as informacións de obrigatoria inserción no taboleiro de anuncios, así como o folleto de tarifas e as normas de valoración.