Xunta de Galicia - Consellería de Economía e Facenda

Imposto sobre Transmisións Patrimoniais e Actos Xurídicos Documentados

O imposto sobre transmisións patrimoniais e actos xurídicos documentados, ven regulado no Real Decreto Lexislativo 1/1993, de 24 de setembro, polo cal se aproba o Texto refundido da Lei do Imposto sobre Transmisións patrimoniais e Actos Xurídicos Documentados, e no Real Decreto 828/1995, de 29 de maio, polo cal se aproba o Regulamento do Imposto sobre Transmisións patrimoniais e Actos Xurídicos Documentados.

A pesar do seu tratamento unitario nunha soa norma, contén en realidade tres impostos diferentes:

O IMPOSTO SOBRE TRANSMISIÓNS PATRIMONIAIS ONEROSAS

  1. ¿QUEN TEN OBRIGA DE DECLARA-LO IMPOSTO? (art. 7 L)

    Teñen obriga de declara-lo imposto aquelas persoas que adquiran bens e dereitos como consecuencia de transmisións onerosas por actos "inter vivos", así como aqueles a favor dos cales se constitúan dereitos reais, préstamos, fianzas, arrendamentos, pensións e concesións administrativas.

    Os casos máis comúns son os seguintes:

    • compravenda de bens tanto mobles coma inmobles: tería obriga de declarar o adquirente
    • constitución de dereitos reais (usufructos, servidumes...): tería obriga de declarar a persoa a favor da cal se constitúen.
    • arrendamentos: tería obrliga de declarar o arrendatario
    • pensións: tería obriga de declarar o pensionista.

    É conveniente aclarar que este imposto grava as transmisións que se producen por un particular, nunca as que se realizan por empresarios ou profesionais no exercicio da súa actividade empresarial ou profesional, xa que as mesmas están gravadas polo Imposto sobre o valor engadido (IVE). Polo tanto prodúcese unha incompatibilidade absoluta entre o imposto sobre transmisións patrimoniais onerosas e o IVE. A operación virá gravada, no seu caso, por un ou outro imposto.

    Ex.: a compra dun piso novo a un promotor está suxeita a IVE mentres que se se adquire de segunda mano ao antigo titular que vivía na mesma, está suxeita ao Imposto sobre transmisións.

    A norma do imposto establece determinadas exencións no art. 45, que implican a non tributación, pero que non evitan a obriga de presentar declaración.

  2. ¿QUE PRAZO TEÑO PARA FACER A DECLARACIÓN? (art. 102 R)

    O prazo para a presentación é de trinta días hábiles, a contar desde o seguinte a aquel no cal se cause o acto ou contrato.

  3. ¿ONDE TEÑO QUE PRESENTA-LA DECLARACIÓN? (art. 103 R)

    O artigo 103 do regulamento establece a oficina competente dependendo do acto ou contrato do que se trata e tendo en conta as diversas modalidades do imposto, polo que se recomenda a súa lectura para a súa exacta determinación. Sen prexuízo do anterior sinálanse simplificadamente os supostos máis comúns:

    1. Cando o acto comprenda exclusivamente transmisión, arrendamento e constitución de dereitos reais sobre bens inmobles: a oficina correspondente ao lugar no que radiquen os inmobles.
    2. Cando o acto se refira a buques ou aeronaves, será competente a oficina na circunscrición da cal radique o Rexistro.
    3. Cando o acto se refire a transmisión de vehículos, na oficina correspondente ao territorio onde o adquirente teña a súa residencia habitual se é persoa física ou o seu enderezo fiscal se é persoa xurídica.
    4. Cando o acto comprenda exclusivamente transmisión de bens mobles semoventes ou créditos, así como a constitución e cesión de dereitos reais sobre os mesmos, na oficina correspondente ao territorio onde o adquirente teña a súa residencia habitual se é persoa física ou o seu enderezo fiscal se é persoa xurídica.
    5. Cando se refira exclusivamente á constitución de préstamos simples, fianzas, arrendamentos non inmobiliarios e pensións, na oficina correspondente ao territorio onde o suxeito pasivo teña a súa residencia habitual ou enderezo fiscal, segundo se trate de persoa física ou xurídica.

    Pode consultar as oficinas xestoras, os seus enderezos e teléfonos, así como os concellos que corresponden a cada unha delas. Na oficina que lle corresponda pode expo-las dúbidas que teña á hora de cubri-la súa declaración.

  4. ¿ CÓMO SE FAI A PRESENTACIÓN TELEMÁTICA ? (A presentación das declaracións do Imposto de Transmisións Onerosas tamén poderá efectuarse por vía telemática segundo o último apartado desta guía)

    ¿QUE DOCUMENTACIÓN TEÑO QUE PRESENTAR? (art. 98 R)

  5. Na oficina xestora que lle corresponda deberá presentar a seguinte documentación:

    1. Fotocopias dos D.N.I. de tódolos interesados.
    2. Os documentos que comprendan os feitos impoñibles (Ex. o contrato no caso dunha compravenda), e no caso de non existiren aqueles, unha declaración.
    3. Se a operación se refire a bens inmobles, copia do último recibo do Imposto sobre bens inmobles (IBI).
    4. Modelo 600 de autoliquidación
  6. ¿COMO SE FAI A DECLARACIÓN DO IMPOSTO? (art. 99 R)

    No imposto sobre transmisións patrimoniais onerosas, o contribuínte está obrigado a realiza-la autoliquidación do imposto e ingresa-las cantidades resultantes. Para isto deberá cumprimentar o modelo 600 ou o 620 se se trata de transmisións de vehículos.

    Os modelos poderá adquirilos nas oficinas xestoras e nos mesmos existen instruccións para a súa cumprimentación.

  7. ¿CAL É O TIPO DO IMPOSTO SOBRE TRANSMISIÓNS ?

    O tipo que se aplica á base impoñible na Comunidade Autónoma de Galicia será o seguinte:

    • O 7% no caso de transmisións de bens inmobles, así como a constitución e cesión de dereitos que recaian sobre os mesmos, salvo dereitos reais de garantía.
    • O 4 %, se se trata da transmisión de bens mobles e semoventes, así como a constitución e cesión de dereitos reais sobre os mesmos, salvo os dereitos reais de garantía.

      Aplicarase este tipo igualmente a calquera outro acto suxeito que non teña un tipo específico.

    • O 1 %, se se trata da constitución de dereitos reais de garantía, pensións, fianzas ou préstamos, incluso os representados por obrigas, así como a cesión de créditos de calquera natureza.

    Os tipos anteriores aplicaranse sobre o valor real do ben. Se necesita coñece-lo valor real de determinados bens inmobles pode consulta-los coeficientes sobre valores catastrais.

  8. ¿QUE INCONVENIENTES TEN NON PRESENTA-LA DECLARACIÓN DO IMPOSTO? (art. 122) e (art.123 R)

    Aparte das posibles consecuencias derivadas da falta de presentación e ingreso, comúns a tódolos impostos, o imposto sobre transmisións patrimoniais onerosas posúe certas garantías para a súa presentación que convén ter en conta. Así, a súa non presentación pode implicar que:

    • os rexistros da propiedade non autoricen o cambio de titular dos bens
    • os documentos nos que conste o feito impoñible no se admitirán nin terán efecto en oficinas ou rexistros públicos
|
arriba
|

O IMPOSTO SOBRE OPERACIÓNS SOCIETARIAS

  1. ¿QUEN TEN OBRIGA DE DECLARAR O IMPOSTO? (art. 19), (art. 22) e (art. 23 L)

    Existe obriga de declarar o imposto cando se realizan as seguintes operacións:

    1. A constitución, aumento e diminución de capital, fusión, escisión e disolución de sociedades.
    2. As achegas que efectúen os socios para repor perdas sociais.
    3. O traslado a España da sede de dirección efectiva ou do domicilio social dunha sociedade, cando nin unha nin outro estivesen previamente situados nun Estado membro da Comunidade Económica Europea, ou nestes a entidade non tivese sido gravada por un imposto similar ao regulado no presente Título.

    A norma do imposto establece determinadas exencións no art. 45, que implican a non tributación por este imposto, pero que non evitan a obriga de presentar declaración. Merecen ser destacadas as que se establecen para determinadas operacións de fusión e escisión.

    É suxeito pasivo deste imposto:

    1. Na constitución, aumento de capital, fusión, escisión, traslado de sede de dirección efectiva ou domicilio social e achegas dos socios para repor perdas, a sociedade .
    2. Na disolución de sociedades e reducción de capital social, os socios, copropietarios, comuneiros ou partícipes polos bens e dereitos recibidos.
  2. ¿QUE SE ENTENDE POR SOCIEDADE NESTE IMPOSTO?

    Cando se fala de sociedade, non so se está a referir a sociedades mercantís senón que tamén inclúe a:

    1. As persoas xurídicas non societarias que persigan fins lucrativos.
    2. Os contratos de contas en participación.
    3. A copropiedade de buques.
    4. A comunidade de bens, constituída por actos inter vivos, que realice actividades empresariais.
    5. A mesma comunidade constituída ou orixinada por actos mortis causa, cando continúe en réxime de indivisión a explotación do negocio do causante por un prazo superior a tres anos.
  3. ¿QUE PRAZO TEÑO PARA FACE-LA DECLARACIÓN? (art. 102 R)

    O prazo para a presentación é de trinta días hábiles, a contar desde o seguinte a aquel no que se cause o acto ou contrato.

  4. ¿ CÓMO SE FAI A PRESENTACIÓN TELEMÁTICA ? (A presentación das declaracións do Imposto de Transmisións Onerosas tamén poderá efectuarse por vía telemática segundo o último apartado desta guía)

    ¿QUE DOCUMENTACIÓN TEÑO QUE PRESENTAR? (art. 98 R)

  5. ¿ONDE TEÑO QUE PRESENTA-LA DECLARACIÓN? (art. 103 R)

    Salvo que o documento comprenda algún concepto suxeito á cota gradual do gravame de Actos Xurídicos Documentados, á que se refire o artigo 72 deste Regulamento, caso no cal será competente a oficina na circunscrición da cal radique o Rexistro no que debería procederse a a inscrición ou anotación, a regra xeral é que cando o acto ou documento se refira a operacións societarias a oficina competente sexa aquela na circunscrición da cal radique o enderezo fiscal da entidade .

    Pode consultar as oficinas xestoras, os seus enderezos e teléfonos, así como os concellos que corresponden a cada unha delas. Na oficina que lle corresponda pode expo-las dúbidas que teña á hora de cubri-la súa declaración.

  6. ¿QUE DOCUMENTACIÓN TEÑO QUE PRESENTAR?(art. 98 R)

    Na oficina xestora que lle corresponda deberá presenta-la seguinte documentación:

    1. Fotocopias dos D.N.I. o C.I.F. de tódolos interesados.
    2. Os documentos que comprendan os feitos impoñibles (Ex. Escritura da constitución de sociedade ) e, no caso de non existir aqueles, unha declaración.
    3. Modelo 600 de autoliquidación.
  7. ¿COMO SE FAI A DECLARACIÓN DO IMPOSTO? (art. 99 R)

    No imposto sobre operacións societarias, o contribuínte está obrigado a realiza-la autoliquidación do imposto e ingresa-las cantidades resultantes. Para isto deberá cumprimenta-lo modelo 600 .

    Os modelos poderá adquirilos nas oficinas xestoras e nos mesmos existen instruccións para a súa cumprimentación.

  8. ¿CAL É O TIPO DO IMPOSTO SOBRE OPERACIÓNS SOCIETARIAS?

    O tipo do imposto de operacións societarias é do 1%.

  9. >¿QUE INCONVENIENTES TEN NON PRESENTA-LA DECLARACIÓN DO IMPOSTO? (art. 122) e (123 R)

    Aparte das posibles consecuencias derivadas da falta de presentación e ingreso, comúns a tódolos impostos, o imposto sobre operacións societarias posúe certas garantías para a súa presentación que convén ter en conta. Así, a súa non presentación pode implicar que:

    • os rexistros mercantís non admitirán para a súa inscrición ningún documento que conteña actos ou contratos suxeitos.
    • os documentos nos cales conste o feito impoñible non se admitirán nin terán efecto en oficinas ou rexistros públicos
|
arriba
|

O IMPOSTO SOBRE ACTOS XURÍDICOS DOCUMENTADOS

O imposto sobre actos xurídicos documentados grava os seguintes tipos de documentos en canto que reúnen certas características citadas na norma:

  • documentos notariais
  • documentos mercantís
  • documentos administrativos

Dada a gran variedade deste imposto, e tendo en conta que algunhas modalidades se pagan mediante efectos timbrados, polo que xeralmente non ocasionan dúbidas xestoras, e noutras existen intermediarios que asumen os labores de xestión, referirémonos aos supostos que máis afectan aos contribuíntes individuais, polo tanto soamente tratarémo-la modalidade de documentos notariais no que se refire á súa cota variable.

  1. ¿QUEN TEN OBRIGA DE DECLARA-LO IMPOSTO? (art. 21), (art. 30) e (art. 31 L)

    Estarían obrigados a presentar declaración por este imposto:

    1. os adquirentes de bens ou dereitos que documenten as súas adquisicións en documentos notariais.
    2. as persoas que insten ou soliciten documentos notariais.
    3. as persoas no interese das cales se expidan os documentos notariais.

    sempre e cando o documento cumpra tódolos seguintes requisitos:

    1. se trate de primeiras copias de escrituras e actas notariais.
    2. teña por obxecto cantidade ou cosa valuable.
    3. conteña actos ou contratos inscritibles nalgún dos seguintes rexistros:
      • Rexistro da Propiedade
      • Rexistro Mercantil
      • Rexistro da Propiedade Industrial
      • Rexistro Bens Mobles
    4. non estea suxeita ao imposto sobre sucesións e doazóns, transmisións patrimoniais onerosas ou operacións societarias.
  2. ¿QUE PRAZO TEÑO PARA FACE-LA DECLARACIÓN? (art. 102 R)

    O prazo para a presentación é de trinta días hábiles, a contar desde o seguinte a aquel no cal se cause o acto o contrato.

  3. ¿ONDE TEÑO QUE PRESENTA-LA DECLARACIÓN? (art. 103 R)

    A oficina competente será aquela na circunscrición da cal radique o Rexistro no que debería procederse á inscrición ou anotación dos bens.

    Pode consulta-las oficinas xestoras, os seus enderezos e teléfonos, así como os concellos que corresponden a cada unha delas. Na oficina que lle corresponda pode expo-las dúbidas que teña á hora de cubri-la súa declaración.

  4. ¿ CÓMO SE FAI A PRESENTACIÓN TELEMÁTICA ? (A presentación das declaracións do Imposto de Transmisións Onerosas tamén poderá efectuarse por vía telemática segundo o último apartado desta guía)

    ¿QUE DOCUMENTACIÓN TEÑO QUE PRESENTAR? (art. 98 R)

  5. ¿QUE DOCUMENTACIÓN TEÑO QUE PRESENTAR? (art. 98 R)

    Na oficina xestora que lle corresponda deberá presenta-la seguinte documentación:

    1. Fotocopias dos D.N.I. o C.I.F. de tódolos interesados.
    2. O documento notarial
    3. Modelo 600 de autoliquidación.
  6. ¿COMO SE FAI A DECLARACIÓN DO IMPOSTO? (art. 99 R)

    No imposto sobre actos xurídicos documentados, documentos notariais (cota gradual), o contribuínte está obrigado a realizar a autoliquidación do imposto e ingresa-las cantidades resultantes. Para isto deberá cumprimentar o modelo 600 .

    Os modelos poderá adquirilos nas oficinas xestoras e nos mesmos existen instruccións para a súa cumprimentación.

  7. ¿CAL É O TIPO DO IMPOSTO SOBRE ACTOS XURÍDICOS DOCUMENTADOS, DOCUMENTOS NOTARIAIS, COTA GRADUAL?

    O tipo do imposto é con carácter xeral do 1%, con dúas excepcións:

    • Para as primeiras copias de escrituras que documenten a primeira adquisición de vivenda habitual ou a constitución de préstamos hipotecarios destinados o seu financiamento, que será do 0,75%.
    • Para as primeiras copias de escrituras que documenten transmisións de bens inmobles en que se renunciara á exención sobre o valor engadido, tal e como se contempla no artigo 20.Dous da Lei 37/1992, do 28 de decembro, do imposto sobre o valor engadido, o tipo de gravamen será do 2%.

    Este tipo aplicarase sobre o valor declarado no documento, sen prexuízo da comprobación administrativa.

  8. ¿QUE INCONVENIENTES TEN NON PRESENTA-LA DECLARACIÓN DO IMPOSTO? (art. 122) e (art. 123 R)

    Aparte das posibles consecuencias derivadas da falta de presentación e ingreso, comúns a tódolos impostos, o imposto de actos xurídicos documentados posúe certas garantías para a súa presentación que convén ter en conta. Así, a súa non presentación pode implicar que:

    • os rexistros públicos non admitirán para a súa inscrición ningún documento que conteña actos ou contratos suxeitos.
    • os documentos nos cales conste o feito impoñible non se admitirán nin terán efecto en oficinas ou rexistros públicos
  9. ¿TRIBUTA POR ACTOS XURÍDICOS A ADQUISICIÓN DE INMOBLES?

    Tributarase por actos xurídicos documentados, documentos notariais, cota gradual, se se cumpren as condicións citadas anteriormente. Neste caso concreto será determinante se a compravenda tributou por IVE ou por Transmisións Patrimoniais Onerosas (TPO). No primeiro caso si habería que tributar por AXD, mentres que no segundo non, dada a incompatibilidade entre AXD (cota gradual) e TPO.

  10. ¿COMO TRIBUTAN OS PRÉSTAMOS HIPOTECARIOS CONCEDIDOS POR ENTIDADES FINANCEIRAS?

    Ao tratarse de forma conxunta os préstamos hipotecarios, e seren concedidos por entidades financeiras, estarían suxeitos a IVE pero exentos, polo que tributarían pola cota gradual de documentos notariais.

    A base sobre a que se aplicaría o tipo sería a total responsabilidade hipotecaria e o obrigado ao pago sería o que recibe o préstamo.

  • ¿ CÓMO SE FAI A PRESENTACIÓN TELEMÁTICA ? (Orde de 30 abril 2004 pola que se regula o procedemento para o pagamento e a presentación telemáticos das autoliquidacións correspondentes ó imposto sobre transmisións patrimoniais e actos xurídicos documentados)

    Para poder efectua-la presentación telemática deberá acceder á oficina virtual tributaria que se atopa na portada da nosa páxina web e dispoñeer do certificado de usuario expedido pola FNMT-RCM ou por outras autoridades certificadoras admitidas pola consellería de economía e facenda.
    As especialidades desta forma de presentación son as seguintes:

    1. Para que se teña por realizada a presentación telemática destes impostos é necesario que previamente se realice o pagamento da cantidade resultante da autoliquidación. No caso contrario terase por non realizada a presentación.
      O pagamento das autoliquidacións para presentar de forma telemática poderá efectuarse das seguintes formas:
      • Mediante ingreso presencial da cantidade resultante da autoliquidación en calquera das entidades colaboradoras autorizadas por esta consellería para o cobro de autoliquidacións presentadas telematicamente. O ingreso realizarase mediante o documento de ingreso que para estes efectos xerará a aplicación informática e imprimirá o usuario. Unha vez realizado o pagamento, a entidade colaboradora facilitará un número NRC identificativo do ingreso realizado que será requirido posteriormente pola aplicación informática para completar a presentación. .
      • Mediante pagamento telemático. O usuario accederá ás aplicacións específicas a través da páxina web da Consellería de Economía e Facenda e efectuará o pagamento das correspondentes autoliquidacións a través das entidades colaboradoras autorizadas por esta consellería para o pagamento telemático. A entidade efectuará as comprobacións oportunas e aceptará ou rexeitará o cargo. Caso de ser aceptado o cargo, efectuará o aboamento na correspondente conta restrinxida de recadación de tributos e xerará un NRC por cada autoliquidación.
    2. A presentación da autoliquidación do imposto e a súa data acreditarase mediante a impresión do documento (modelo 600) xerado pola aplicación informática, no que constarán os datos identificativos do suxeito pasivo, transmitente, presentador, datos dos bens e liquidación. Ademais xerarase un código interno que permitirá asociar de forma inequívoca a autoliquidación presentada telematicamente coa impresa polo contribuínte.
    3. Os contribuíntes deberán conservar os xustificantes de pagamento e presentación, no caso de que a autoliquidación presentada non dea lugar a ingreso bastará a xustificación da presentación mediante a impresión do documento (modelo 600) xerado pola aplicación informática tal e como se dispón nol punto 2.

    • Aquelas persoas que non desexen realizar a presentación telemática deste imposto ou ben non dispoñan do certificado de usuario expedido pola FNMT-RCM ou por outras autoridades certificadoras admitidas pola Consellería de Economía e Facenda, poderán cubrir a súa autoliquidación utilizando o programa de axuda existente na páxina web desta consellería. Para estes efectos e unha vez introducidos os datos correspondentes, o sistema imprimirá catro exemplares do modelo 600 (exemplar para o interesado, exemplar para a Administración, talón de cargo e carta de pagamento) que serán válidos para a presentación do imposto de forma presencial nas oficinas xestoras desta consellería..

     

Nota: Esta información ten carácter divulgativo e non recolle o contido íntegro do Real Decreto Lexislativo 1/1993, de 24 de setembro, polo que se aproba o Texto refundido da Lei do Imposto sobre Transmisións patrimoniais e Actos Xurídicos Documentados (B.O.E. 20/10/1993), e no Real Decreto 828/1995, de 29 de maio, polo que se aproba o Regulamento do Imposto sobre Transmisións patrimoniais e Actos Xurídicos Documentados (B.O.E. 22/6/1995). A estes efectos acompáñase o texto íntegro das normas antes citadas para a súa consulta.

A CONSELLERÍA
Benvida do Conselleiro
Organigrama
Contratación (Lei Transp)
OFICINAS VIRTUAIS
ÁREAS
Secretaría Xeral e do Patrimonio
Tributos
Orzamentos
Intervención Xeral
Planificación Económica e Fondos Comunitarios
Política Financeira e Seguros
ARQUIVOS
Normativa
Documentos
HEMEROTECA
Novas
Imaxes
Multimedia
ORGANISMOS
Web do CIXTEC
Web do IGE
Web do IGAPE
Web do CES-GALICIA
Web do TGDC