REGULAMENTO PARA A EXECUCIÓN DA LEI DO PATRIMONIO DA COMUNIDADE AUTÓNOMA GALEGA

Volver Sumario - Título I |
Continuar: Título III |
Disposicións

|

TÍTULO SEGUNDO.
Utilización e aproveitamento do patrimonio

|

CAPÍTULO PRIMEIRO.
Formas de utilización dos bens demaniais

|

Artigo 117

1. O destino propio dos bens demaniais é a súa utilización para o uso xeral ou para a prestación de servicios públicos.
2. Non obstante, tales bens poderán ser obxecto doutras utilizacións de acordo coas esixencias do interese xeral e con subxección ó disposto na Lei do Patrimonio da Comunidade Autónoma (113), neste Regulamento e, se é o caso, nas disposicións relativas ós servicios públicos que os teñan afectados.
3. A utilización e aproveitamento de bens ou dereitos demaniais por persoas ou entidades determinadas suxeitaranse a previa licencia, permiso ou concesión administrativa (114) nos termos establecidos no presente Regulamento (115) (art. 15 Lei).

(113) Arts. 50 a 59 de dita lei.

(114) Todas estas formas de autorización están sometidas á Lei 13/1991, do 9 de decembro, de taxas, prezos e exaccións reguladoras da CA de Galicia (DOG nº 241, do 13 de decembro). Non obstante, dita norma debe entederse á luz da sentencia do Tribunal Constitucional 185/1995, do 14 de decembro (BOE nº 11, do 12 de xaneiro de 1996), que trata a fixación de prezos públicos polo uso privativo e o aproveitamento especial do dominio público.

(115) Arts. 121 a 137 deste regulamento. Véxase tamén a súa disposición adicional 1ª.

Artigo 118

A utilización dos bens de dominio público pola propia Administración rexerase pola Lei do Patrimonio da Comunidade Autónoma e por este Regulamento. Se estivesen afectos a un servicio público, axustarase ademais ás súas regras específicas (116) responsables do seu funcionamento (art. 48.1 Lei).

(116) Debido a un erro non corrixido falta parte do texto, que se pode integrar co sinalado no art. 48.1 da Lei do patrimonio da CA galega. A parte omitida é a seguinte: "... e ás instruccións dictadas polas autoridades..."

Artigo 119

1. Excepcionalmente, con fundamento no fomento e planificación da actividade económica de Galicia (117), e, en todo caso, con fins de estudio, investigación ou explotación a Comunidade Autónoma de Galicia poderá reservar, mediante Lei de Galicia, o uso exclusivo de bens de uso público, ou declarados de dominio público por normas con categoría de Lei, sempre que concorran os seguintes requisitos:
   1. Que a reserva non afecte a recursos previamente reservados polo Estado.
   2. A potestade da reserva axustarase ós termos da lexislación do Estado e ás bases de planificación económica xeral.
   3. Non se poderá establecer en prexuício de dereitos adquiridos polos particulares para o uso dos bens. Se a súa motivación consistise nunha deficiente ou irracional explotación dun recurso determinado, a lei que declare a reserva dispoñerá a previa expropiación e indemnización dos afectados pola medida.
   4. Determinación do prazo da súa duración, que en ningún caso será superior ó máximo previsto para a concesión demanial do recurso do que se trate.
2. O uso privativo exclusivo que retén a Administración, unha vez establecidas as reservas ás que se refire o parágrafo anterior, será obxecto de explotación con referencia ás normas que regulan a utilización dos bens patrimoniais no presente Regulamento (118).
3. En ningún caso se poderán establecer reservas demaniais por motivos fiscais ou de orde ou seguridade pública (48.2 Lei).

(117) Véxanse os arts. 28.4, 30.1.1 e 55 do EAG , así como os arts. 128.2, 131, 148.1.13ª e 149.1.13ª da CE . Tamén pode resultar ilustrativa a exposición de motivos da Lei do patrimonio da CA galega na parte dedicada ás reservas demaniais.

(118) Arts. 138 e ss. deste regulamento.

Artigo 120

O uso xeral dos bens de dominio público non está suxeito a licencia, correspondendo a tódolos cidadáns sen máis limitación cás seguintes:

1. O impedimento do mesmo dereito ós demais cidadáns.
2. O respeto á natureza do ben.
3. As que impoña o ordenamento xurídico por razón da súa conservación, adscrición ou orde pública (art. 49 Lei).

Artigo 121

O uso común especial dos bens demaniais realizado polas persoas ou entidades determinadas de modo que non impida o doutros deberá suxeitarse ó outorgamento de previa licencia co fin de garanti-la continuidade do uso común xeral se concorresen nel as circunstancias singulares de perigosidade, intensidade de uso ou outras semellantes (art. 50 Lei).

Artigo 122

O uso privativo por persoas ou entidades dos bens de dominio público mediante a ocupación dunha porción dos mesmos, de modo que limite ou exclúa a utilización polos demais interesados, requirirá o previo outorgamento dun título adecuado á súa natureza, de conformidade coas seguintes regras:

1. O uso normal, conforme ás disposicións ou afectación dos bens, que non implique a realización de obras permanentes ou instalacións fixas requirirá tan só permiso de ocupación temporal.
2. Os usos consistentes en estacionamento de materiais ou instalacións de carácter accesorio e non permanente esixirán tamén permiso de ocupación temporal.
3. Os usos anormais, non conformes co destino dos bens, e aqueles que requirisen unha ocupación permanente mediante obras e instalacións de carácter fixo, outorgaranse mediante concesión administrativa (art. 51 Lei).

Artigo 123

1. A competencia para o outorgamento das concesións que por disposición legal non veña especificamente determinada corresponderalle ó Consello da Xunta, a proposta da Consellería responsable da xestión, conservación e administración dos bens demaniais implicados.
2. As licencias, autorizacions e permisos de ocupación temporal outorgaranos os órganos competentes da Consellería titular das facultades de xestión, conservación e administración dos bens demaniais dos que se trate (art. 59 Lei).

Artigo 124

1. As licencias habilitantes de usos comúns especiais outorgaranse directamente ós peticionarios salvo se, por calquera circunstancia, se limitase o número das mesmas. Neste caso outorgaranse por licitación e, se non fose posible por ter que reunir tódolos interesados as mesmas condicións, mediante sorteo.
2. Non serán transmisibles as licencias que se refiran ás cualidades persoais do suxeito e aquelas que a normativa específica así o determine. A transmisión, cando proceda, requirirá acto expreso aprobatorio para a súa eficacia fronte á Administración outorgante (art. 52 Lei).

Artigo 125

1. Os permisos de ocupación temporal levan implícitos a cláusula de precariedade e poderán revocarse libremente en calquera momento pola Administración sen que o interesado teña dereito a indemnización ningunha.
2. Se houbese varios solicitantes, observaranse sempre as regras de publicidade e concorrencia, outorgándose os permisos logo de licitación (art. 53 Lei).
3. Os permisos de ocupación temporal consideraranse revocados «ipso iure» en virtude da resolución que acorda a desafectación (119) dos bens sobre os que recaian.

(119) Arts. 23 e ss. deste regulamento.

Artigo 126

Cando as licencias habilitantes de usos comúns especiais e os permisos de ocupación temporal deban de outorgarse por licitación, seguirase, en canto sexa posible, o procedemento establecido neste Regulamento para as concesións (120).

(120) Arts. 130 e ss. deste regulamento.

Artigo 127

As concesións de disfrute ou uso privativo de bens de dominio público da Comunidade Autónoma rexeranse pola Lei do Patrimonio da Comunidade Autónoma, polas normas deste Regulamento (121) e pola lexislación específica aplicable en función da natureza dos bens dos que se trate (art. 54 Lei).

(121) Arts. 54 e ss. da Lei do patrimonio da CA e 128 e ss. deste regulamento.

Artigo 128

As concesións administrativas de dominio público axustaranse ós seguintes principios:

1. Serán de outorgamento discrecional por parte da Administración.
2. O prazo de duración non poderá exceder de 50 anos sen prexuício da súa prórroga por mutuo acordo.
3. Outorgaranse para unha finalidade concreta, con determinación do seu obxecto e límites.
4. Fixarase o pago dun canon anual (122), dunha contía non inferior ó resultado de aplicar ó valor do elemento patrimonial do que se trate o tipo de interese básico do Banco de España.
5. Outorgaranse a salvo o dereito de propiedade e sen prexuício de terceiro.
6. Levarán implícita a facultade de rescate antes do seu vencemento, mediante indemnización, se o xustificasen circunstancias sobrevidas de interese público.
7. Levarán anexas as facultades administrativas de inspección e vixilancia sobre os bens obxecto de concesión, así como sobre as instalacións ou construccións que puidesen existir.
8. Establecerán garantías suficientes para asegura-lo bo uso dos bens e instalacións por parte do concesionario.

(122) Véxase o art. 9.1 b) da Lei 13/1991, do 9 de decembro, de taxas, prezos e exaccións reguladoras da CA de Galicia (DOG nº 241, do 13 de decembro).

Artigo 129

As concesións conterán as cláusulas que se xulguen convenientes ó caso concreto e, ademais, as seguintes:

1. Obxecto da concesión administrativa e límites ós que se extendese.
2. Obras e instalacións que, se é o caso, se tivesen que realizar, prazo para a súa execución e prohibicións de realizar outras distintas.
3. Prazo de concesión, data de comenzo e prórrogas posibles.
4. Deberes e facultades do concesionario.
5. Canon que se tivese que satisfacer á Comunidade Autónoma.
6. Se é o caso, réxime de tarifas que tivesen que percibir dos usuarios con descomposición dos seus factores constitutivos e bases para a súa revisión.
7. Obriga por parte do concesionario de manter en bo estado de conservación o dominio público utilizado e as obras e instalacións que construíse.
8. Fianzas que se constituirán a favor da Administración por parte do concesionario.
9. Reversión ou non das obras e instalacións ó remata-la concesión.
10. Sanción por incumprimento das obrigas contraídas.
11. Obriga do concesionario de abandonar e deixar libres e vacuos, ó dispor da Comunidade Autónoma, dentro do prazo, os bens obxecto de utilización e recoñecemento da potestade daquela para acordar e executar por si o lanzamento.

Artigo 130

1. Cando algunha persoa, natural ou xurídica, por propia iniciativa, pretenda realizar unha ocupación privativa do dominio público que se teña que lexitimar mediante concesión administrativa, deberá presentar unha memoria explicativa da conveniencia e oportunidade da ocupación e xustificativa da súa adecuación ás esixencias do interese xeral.
2. A Consellería competente examinará a petición e tendo en conta o interese público concorrente, admitiraa a trámite ou desbotaraa, unha vez oída a Dirección Xeral do Patrimonio.

Artigo 131

Admitida a trámite a petición, a propia Consellería redactará o proxecto correspondente, que conterá, en todo caso, unha memoria xustificativa da ocupación privativa do dominio público afectado, identificará física e xuridicamente a porción de dominio público obxecto de ocupación mediante a aportación dos datos, planos e documentos necesarios para o efecto, e incorporará o presuposto, planos e prego de condicións, se é o caso, das obras que se debesen executar, así como o prego de condicións que deban rexe-la concesión con subxección ó disposto no artigo 129.

Artigo 132

1. Aprobado pola Consellería o proxecto, convocarase licitación para adxudicalo.
2. A adxudicación das concesións acomodarase ó disposto no presente Regulamento para o alleamento de bens patrimoniais (123) e a lexislación sobre contratación administrativa para a xestión dos servicios públicos (124) e será acordada pola Consellería competente por razón da materia (art. 55 Lei).
3. As concesións sobre bens de dominio público da Comunidade Autónoma formalizaranse en documento administrativo, subscrito pola Dirección Xeral do Patrimonio, sen prexuício de que calquera das partes poida esixir, pola súa conta, a formalización do contrato en escritura pública.

(123) Arts. 60 e ss.

(124) Arts. 115 e ss. da LCAP e 196 e ss. do Rto. xeral de contratación do Estado, aprobado polo D. 3.410/1975, do 25 de novembro (BOE nº 311 e 312, do 27 e 29 de decembro).

Artigo 133

Adxudicada a concesión, o seu exercicio será obrigatorio polo concesionario, quen ten a facultade de utilizar privativamente a parte de dominio público que lle fose concedida. O seu dereito é transmisible, excepto no caso de que a concesión fose outorgada en atención ás súas cualidades persoais e naqueloutros nos que a normativa específica así o determine, pero a transmisión requirirá acto expreso aprobatorio para a súa eficacia fronte á Administración outorgante.

Artigo 134

Son causas de extinción das concesións:

1. O transcurso do prazo ou da súa prórroga.
2. O rescate.
3. A renuncia e o non exercicio do dereito nos casos nos que proceda.
4. A caducidade ou resolución da relación concesional.
5. A desaparición ou esgotamento da cousa.
6. A degradación do título concesional por desafectación do ben demanial.
7. E calquera outra causa admitida en dereito (art. 56 Lei).

Artigo 135

Nos supostos de degradación do título concesional, por desafectación do demanio (125) que lle serve de fundamento, os titulares de autorizacións, licencias ou concesións outorgadas legalmente continuarán na posesión dos seus dereitos.

Non obstante, será declarada a caducidade das concesións das que vencese o prazo ou daquelas nas que a Administración reserva para si a facultade de libre rescate, sen prexuício de que a Consellería de Economía e Facenda, a proposta da Dirección Xeral do Patrimonio, poida acorda-la expropiación de considerar que o mantemento da concesión prexudicaría o posterior destino dos bens ou que os farían desmerecer notoriamente en caso de alleamento (art. 57 Lei).

(125) Arts. 23 e ss. deste regulamento.

Artigo 136

O órgano competente para o outorgamento da concesión poderá modificar, por razóns de interese público, as características da concesión outorgada, así como o canon que viñese abonando o concesionario ou as tarifas que se percibisen dos usuarios.

Artigo 137

1. No alleamento de bens desafectados, os titulares de dereitos sobre eles, resultantes dunha concesión, terán a facultade de adquirilos con preferencia a calquera outra persoa que non teña ó seu favor un dereito de retracto legalmente establecido.
2. Os dereitos de adquisición preferente regulados no parágrafo anterior, non terán lugar nos supostos a que fan referencia os artigos 83 e 88 deste Regulamento.
3. As entidades que, consonte cos artigos 83 e 88, recibisen bens sobre os que recaian os dereitos anteriormente establecidos en favor de beneficiarios de concesións e autorizacións poderán liberalos con cargo exclusivo ós seus fondos propios en igualdade de termos coa Comunidade Autónoma, podendo instar, se é o caso, o exercicio de potestade expropiatoria (art. 58 Lei).

| |

CAPÍTULO SEGUNDO.
Explotación dos bens

|

Artigo 138

Correspóndelle ó Consello da Xunta, a proposta da Consellería de Economía e Facenda, dispoñe-lo modo de explotación, consonte co criterio de maior rendabilidade, dos bens patrimoniais que non conveña allear, nas condicións usuais da práctica civil ou mercantil (art. 60 Lei).

Artigo 139

A explotación poderá ser levada a cabo directamente pola propia Administración da Comunidade Autónoma, por unha entidade autónoma dependente da mesma, ou conferirse a particulares mediante contrato (art. 61 Lei).

Artigo 140

1. O expediente de explotación do ben ou bens de dominio privado dos que se trate incoarao a Dirección Xeral do Patrimonio, de oficio ou a instancia de parte e a el incorporará unha memoria comprensiva, de polo menos, os seguintes extremos:
   1. Descrición do ben ou bens da explotación da que se trate.
   2. Posibilidade de explotación.
   3. Estudio económico da mesma, dadas as características peculiares do ben ou bens e a xestión dos intereses propios da Comunidade Autónoma.
   4. Forma de explotación que se considere máis adecuada.
2. Se a memoria conclúe propoñendo a explotación de bens mediante contrato con particulares, xuntarase tamén o modelo das bases ás que se deba somete-lo concurso público, tendo en conta que a contraprestación económica non será en ningún caso inferior á do mercado coas adecuacións periódicas que se deriven das fluctuacións do valor dos cartos.
3. A Asesoría Xurídica e a Intervención Xeral da Xunta de Galicia emitirán informe sobre o expediente (126) e posteriormente será sometido á aprobación do Conselleiro de Economía e Facenda, quen elevará ó Consello da Xunta a proposta correspondente.

(126) Arts. 1º, apartados 2 e 3, e 12º do Regulamento orgánico da Asesoría Xurídica Xeral da Xunta de Galicia, aprobado polo D. 370/1992, do 3 de decembro (DOG nº 252, do 29 de decembro), así como os arts. 93 e ss. do TRLRFO .

Artigo 141

Se o Consello da Xunta acordase que a explotación se levase a cabo directamente ou por medio de entidade autónoma fixará as condicións da mesma. A entrega do ben ó órgano ou entidade a quen se confíe a explotación será realizada pola Dirección Xeral do Patrimonio, a quen lle corresponderá a vixilancia do exacto cumprimento das condicións impostas, de acordo coas instruccións que para o efecto reciba do Conselleiro de Economía e Facenda (art. 62 Lei).

Artigo 142

1. Se o Consello da Xunta dispuxese que a explotación se encomende a particulares mediante contrato, aprobará as bases do concurso, que será convocado e resolto pola Consellería de Economía e Facenda.
2. A convocatoria publicarase no Diario Oficial de Galicia e potestativamente nun dos xornais de maior circulación de Galicia, e terá que conter, polo menos, os seguintes datos:
   1. Identificación do ben.
   2. Sistema de adxudicación e tipo de contrato.
   3. Lugar e horario no que se deben presenta-las proposicións, e día, lugar e hora nos que se realizará a apertura. O prazo de presentación de proposicións non será nunca inferior a quince días nin superior a tres meses.
3. Malia o establecido nos apartados anteriores, o Consello da Xunta poderá acorda-la adxudicación directa da explotación de bens patrimoniais cando concorran circunstancias que así o aconsellen, logo de xustificación razoada no expediente (127) (art. 63.1).

(127) Apartado engadido polo D. 238/1998, do 24 de xullo, polo que se modifica o Rto. de execución da Lei 3/1985 ( DOG nº 156, do 13 de agosto ).

Artigo 143

Están facultadas, para contrata-la explotación de bens patrimoniais da Comunidade Autónoma as persoas que, ostentando plena capacidade de obrar, a tivesen de conformidade coa lexislación xeral de contratos do Estado (128) (art. 64 Lei).

(128) Arts. 15 e ss. da LCAP , modificada nese ámbito pola Lei 53/1999, do 28 de decembro (BOE nº 311, do 29 de decembro).

Artigo 144

1. A celebración do concurso axustarase ós trámites establecidos nos artigos 43 e 45 deste Regulamento.
2. Non obstante, e no referente á composición da Mesa, o representante sinalado na letra d) do artigo 44 será substituído por un representante da Consellería de Economía e Facenda.
3. A adxudicación outorgarase con carácter provisional á proposición que obtivese maior número de votos, decidindo, en caso de empate, o do presidente. Os vocais da Mesa que disintan do acordo da maioría poderán formular, por escrito, voto reservado contra o devandito acordo expresando necesariamente as razóns nas que apoien a súa oposición ó mesmo.
4. A acta da sesión, as proposicións presentadas e, se é o caso, o voto ou votos reservados serán elevados ó Conselleiro de Economía e Facenda para que resolva sobre a adxudicación definitiva.

Artigo 145

1. Acordada a adxudicación definitiva, notificarase ó concursante favorecido e o acordo publicarase no Diario Oficial de Galicia.
2. O contrato formalizarase notarialmente por conta do adxudicatario e coa intervención da Dirección Xeral do Patrimonio, que exercerá a vixilancia precisa sobre a empresa adxudicataria da explotación para garanti-la indemnización do ben do que se trate e, se é o caso, a íntegra percepción das cantidades que teña que paga-lo adxudicatario, así como, en xeral, o cumprimento do contrato.

Para estes efectos, o devandito centro directivo poderá reclama-la colaboración que considere precisa doutros órganos da Administración da Comunidade Autónoma (art. 65 Lei).

Artigo 146

A pedimento do adxudicatario, poderase prorroga-lo contrato por acordo do Consello da Xunta se o resultado satisfactorio da explotación fixese aconsellable esta medida.

A solicitude da prórroga deberá realizarse antes do vencemento do prazo contractual, e dirixirase á Dirección Xeral do Patrimonio, que emitirá informe sobre ela así como tamén á Intervención Xeral, elevándose posteriormente o expediente ó Conselleiro de Economía e Facenda (art. 66 Lei).

Artigo 147

A subrogación de calquera persoa natural ou xurídica nos dereitos ou obrigas do adxudicatario requirirá acordo do Consello da Xunta, a proposta da Consellería de Economía e Facenda. O expediente será tramitado pola Dirección Xeral do Patrimonio co seu informe e o da Intervención Xeral.

A persoa subrogada deberá reuni-los requisitos necesarios para contratar (129) (art. 67 Lei).

(129) Véxase nota ó art. 143 deste regulamento.

Artigo 148

1. Os froitos, rendas ou percepcións de calquera clase ou natureza producidos pola explotación, así como polo alleamento dos bens patrimoniais logo de liquidación, cando sexa preciso, ingresaranse na Tesourería da Xunta con aplicación ós pertinentes conceptos do presuposto de ingresos.
2. Non se admitirán máis excepcións ó disposto no parágrafo anterior cás consignadas nunha lei (130) (art. 68 Lei ).

(130) Art. 15 do TRLRFO .

Volver Sumario - Título I |
Continuar: Título III |
Disposicións