Orde do 18 de xullo de 2000 pola que se crea o Rexistro de Corredores de Seguros, de Sociedades de Corredoría de Seguros e dos seus Altos Cargos e o Rexistro de Diplomas de Mediador de Seguros Titulado.

Sumario

| Saltar sumario | | |

O Estatuto de autonomía para Galicia, aprobado en virtude da Lei orgánica 1/1981, do 6 de abril, non recoñecía inicialmente a esta Comunidade Autónoma competencia en materia de seguros.

Sen embargo, a través da Lei orgánica 6/1999, do 6 de abril, transfírelle á Comunidade Autónoma de Galicia a competencia de desenvolvemento lexislativo e execución en materia de ordenación do crédito, banca e seguros, coa finalidade de equiparar nesta materia as competencias desta Comunidade Autónoma coas doutras.

En aplicación da citada lei orgánica, mediante o Real decreto 1748/1999, do 19 de novembro, transfírense á Comunidade Autónoma de Galicia as funcións e servicios da Administración xeral do Estado en materia de mediadores de seguros. En virtude da dita norma correspóndelle á Comunidade Autónoma de Galicia o desenvolvemento lexislativo e a execución, dentro do seu territorio, das bases de ordenación dos seguros privados contidas na Lei 9/1992, do 30 de abril, de mediación de seguros privados, modificada pola Lei 30/1995, do 8 de novembro, de ordenación e supervisión dos seguros privados, respecto ós mediadores de seguros no que o domicilio social e ámbito de operacións se limitán ó territorio da comunidade.

Pola súa parte, o Decreto 321/1999, do 16 de decembro, asígnalle as funcións e servicios transferidos á Comunidade Autónoma de Galicia nesta materia á Consellería de Economía e Facenda. E a Orde do 12 de xaneiro do 2000, da Consellería de Economía e Facenda, adscríbelle as competencias á Dirección Xeral de Política Financeira e Tesouro.

Baseándose en todo o anterior, cómpre a creación dun rexistro específico no ámbito da Comunidade Autónoma de Galicia, no que se rexistren as persoas físicas e xurídicas que obtiveran autorización para exerce-la actividade de corredoría de seguros e se anoten os feitos máis significativos que as afecten, así como todas aquelas cuestións que deban ser rexistradas de acordo coa normativa vixente.

Así mesmo, pola presente orde, créase o Rexistro de Diplomas de Mediador de Seguros Titulado, na medida en que o dito diploma vén establecido pola normativa para o efecto como un dos requisitos para obte-la mencionada autorización.Por todo iso,

DISPOÑO

| |

CAPÍTULO I.
REXISTRO DE CORREDORES DE SEGUROS, DE SOCIEDADES DE CORREDURÍA DE SEGUROS E DOS SEUS ALTOS CARGOS

Artigo 1. Creación do rexistro.

1. Créase o Rexistro de Corredores de Seguros, de Sociedades de Corredoría de Seguros e dos seus Altos Cargos, coa finalidade de que a Administración autonómica teña en todo momento coñecemento fidedigno da situación das persoas e entidades inscritas nel.
2. O rexistro estará adscrito á Dirección Xeral de Política Financeira e Tesouro, da Consellería de Economía e Facenda.
   

Artigo 2. Ámbito do rexistro.

No rexistro inscribiranse os corredores de seguros e sociedades de corredoría de seguros no que o domicilio social ou profesional e ámbito de operacións quede circunscrito ó territorio da Comunidade Autónoma de Galicia.

Artigo 3. Funcións.

O Rexistro terá as funcións de cualificar, inscribir e certifica-los actos que así o requiran que se refiran a corredores de seguros e sociedades de corredoría de seguros inscritos nel.

Artigo 4. Carácter e efectos do rexistro.

1. O rexistro ten carácter administrativo e a súa eficacia baséase nos principios de publicidade formal e de legalidade, ten carácter público e non se poderá invoca-la súa ignorancia.
2. Os actos suxeitos a inscrición non inscritos non producirán efectos respecto a terceiros de boa fe.
   

Artigo 5. Libros de rexistros.

1. No rexistro levaranse, coa desagregación que resulte necesaria, os seguintes libros:
   1. Libro diario de presentación.
   2. Libros de inscricións de corredores de seguros, de sociedades de corredoría de seguros e dos seus altos cargos.
2. No libro de altos cargos de sociedades de corredoría inscribiranse os administradores ou conselleiros, os directores xerais ou asimilados, os apoderados e os que baixo calquera outro título leven a dirección efectiva da entidade correspondente.
3. Os asentos practicaranse por orde cronolóxica e a súa redacción farase de forma sucinta con remisión ó arquivo correspondente onde conste o documento.
   

Artigo 6. Actos inscribibles.

1. Son actos inscribibles no rexistro:
   1. A autorización administrativa previa.
   2. Os cambios de denominación ou domicilio social así como outras modificacións estatutarias.
   3. As participaciones significativas.
   4. As agrupacións de interese económico e as unións temporais de empresas.
   5. A situación de inactividade.
   6. A revogación da autorización administrativa.
   7. A inhabilitación para o desempeño da actividade de corredoría.
   8. As sancións que, se é o caso, se impuxeran, salvo a de amoestación privada.
   9. Os demais actos que deban inscribirse en virtude da normativa vixente.
2. Respecto ós altos cargos inscribiránse:
   1. O nomeamento.
   2. A suspensión, revogación ou cesamento destes por calquera causa.
   3. A inhabilitación.
   4. As sancións que, se é o caso, se lles impuxeran, salvo a de amoestación privada.
   5. Os demais actos que deban inscribirse en virtude da normativa vixente.
      Consignaranse o nome e apelidos ou denominación social, o domicilio, a nacionalidade, a profesión, o número do documento nacional de identidade e, se se trata de estranxeiros, se é o caso, o do permiso de residencia ou pasaporte.

Artigo 7. Presentación de documentación.

Os documentos que conteñan actos do administrado que deban ser inscritos conforme o establecido no artigo anterior deberán presentarse, acompañados de escrito asinado polo interesado ou polo representante legal da sociedade, dentro dos dez días seguintes ó de adopción dos acordos, presentando, se é o caso, a escritura pública correspondente no prazo dun mes desde a súa inscrición no Rexistro Mercantil.

Artigo 8. Inscrición de oficio.

Cando a inscrición no rexistro teña por causa acordos da Administración, o asento practicarase de oficio con fundamento no acto administrativo correspondente.

Artigo 9. Inscrición das medidas de control especial.

As medidas de control especial que, se fose o caso, se impuxeran serán inscribibles no rexistro, logo de audiencia do interesado, cando a Dirección Xeral de Política Financeira e Tesouro acorde darlles publicidade.

Artigo 10. Cancelación das inscricións das sancións impostas.

As inscricións relativas ás sancións impostas cancelaranse de oficio ou por instancia do interesado.

A cancelación de oficio procederá cando recaera resolución ou sentencia firme estimatoria do recurso interposto contra a sanción.

O interesado terá dereito a solicitar da Dirección Xeral de Política Financeira e Tesouro a cancelación de inscrición da sanción que lle fora imposta, sempre que non incorrese en ningunha nova infracción, dentro dos dous anos seguintes á data da firmeza da sanción para o caso das infraccións leves, cinco anos no caso das graves e oito anos no caso das moi graves.

A iniciación dun expediente administrativo sancionador interromperá os prazos previstos no parágrafo anterior. Se o procedemento concluíse coa imposición dunha nova sanción, as anotacións pendentes cancelaranse cando transcorra o prazo de cancelación aplicable a ela, salvo que o que restase por correr da anterior fose superior, de se-lo caso atenderase á data do seu vencemento.

Artigo 11. Obrigas das persoas e entidades inscritas no rexistro.

As persoas e entidades inscritas no rexistro deberán facilita-la documentación e información necesarias para permiti-lo seu mantemento actualizado, remitindo á Dirección Xeral de Política Financeira e Tesouro os documentos correspondentes na forma establecida no artigo 7. Todo iso sen prexuízo da obriga de atender tamén ós requirimentos individualizados de información que se lles formulen.

Artigo 12. Publicidade do rexistro.

1. Mediante solicitude por escrito na que se exprese a identidade do solicitante e o motivo, poderán acceder ós datos do rexistro non soamente os titulares, senón tamén os que acrediten un interese lexítimo e directo.
2. A publicidade formal poderá realizarse mediante certificación ou nota simple informativa expedida pola Dirección Xeral de Política Financeira e Tesouro.

| |

CAPÍTULO II.
REXISTRO DE DIPLOMAS DE MEDIADOR DE SEGUROS TITULADO

Artigo 13. Creación do rexistro.

Créase o Rexistro de Diplomas de Mediador de Seguros Titulado, adscrito á Dirección Xeral de Política Financeira e Tesouro da Consellería de Economía e Facenda.

Artigo 14. Ámbito do rexistro.

No rexistro inscribiranse todas aquelas persoas que obtivesen o diploma de mediador de seguros titulado expedido pola Consellería de Economía e Facenda.

Artigo 15. Solicitude de certificación.

As persoas inscritas no rexistro poderán solicitar certificación do diploma mediante solicitude por escrito na que se faga consta-la identidade do solicitante.

| |

DISPOSICIÓNS TRANSITORIAS

Primeira

A documentación dos corredores e sociedades de corredoría de seguros transpasadas á Comunidade Autónoma de Galicia en virtude do Real decreto 1748/1999, do 19 de novembro, que figuran como anexo á presente orde, que figurasen nos rexistros ou expedientes que foron obxecto de traspaso, trasladaranse ó rexistro creado por esta orde. Independentemente disto, poderáselles pedi-la documentación que fose necesaria para completa-la inscrición.

Segunda

As sucesivas inscricións relativas ós corredores e sociedades de corredorías de seguros obxecto de traspaso efectuaranse na forma prevista na presente orde.

Terceira

Ós corredores e sociedades de corredoría obxecto de traspaso asígnaselles un novo número de rexistro , con motivo da súa inscrición no rexistro autonómico, que figura no anexo á presente orde. Non obstante, nas follas correspondentes a estas persoas ou entidades farase constar tamén o número de inscrición que tiñan anteriormente no Rexistro Especial de Corredores de Seguros, de Sociedades de Corredoría de Seguros e dos seus Altos Cargos da Dirección Xeral de Seguros do Ministerio de Economía e Facenda.

| |

DISPOSICIÓNS DERRADEIRAS

Primeira

Facúltase ó director xeral de Política Financeira e Tesouro para dictar cantas disposicións sexan necesarias para o desenvolvemento e execución da presente orde.

Segunda

A presente orde entrará en vigor o día seguinte ó da súa publicación no Diario Oficial de Galicia.

| |

ANEXO

Relación de corredores de seguros e de sociedades de corredoría de seguros dos que a documentación foi traspasada pola Dirección Xeral de Seguros do Ministerio de Economía e Facenda á Comunidade Autónoma de Galicia en virtude do Real decreto 1748/1999, do 19 de novembro.

Nome/Denominación social	Anterior nº de rexistro	Novo nº de rexistro
José Eloy Rodríguez Rodríguez	F-81	GF-002
Fernando Rotea Villanueva	F-227	GF-003
Eladio Fernández Vázquez	F-228	GF-004
Fernando Manuel García Diéguez	F-682	GF-005
José Grela Rodríguez	F-776	GF-006
Rogelio Calvar Otero	F-956	GF-007
Julio Cabo Naya	F-979	GF-008
José Liñares García	F-1019	GF-009
Juan Carlos Sánchez Ansede	F-1127	GF-010
Constantino Docampo Fraga	F-1391	GF-011
José Vilariño Vilariño	F-1495	GF-012
Mª de las Nieves Rúa Pazos	F-1550	GF-013
Mª Trinidad Barreiro Carrasco	F-1696	GF-014
Manuela Gómez García	F-1713	GF-015
Jesús Ángel Rego Álvarez	F-1812	GF-016
Enrique Vilela García	F-1845	GF-017
Manuel González Teijeiro	F-1901	GF-018
Francisco Pichel Iglesias	F-2006	GF-019
Quiroga Calviño Correduría de Seguros, S.L.	J-263	GX-001
Eloy Rodríguez Correduría de Seguros, S.L.	J-296	GX-002
Falin y Zapata Correduría de Seguros, S.L.	J-629	GX-003
Corredores de Seguros Alfa, S.L.	J-825	GX-004
Rasegal, S.L.	J-1153	GX-005
Asesoría Díaz, S.L.	J-1209	GX-006
Lavandeira Rabade Coruña Correduría de Seguros, S.C.	J-1556	GX-007