Delegacións Territoriais.

Delegacións territoriais e ámbito de actuación.

1. As delegacións da Consellería de Economía e Facenda sitúanse na Coruña, Lugo, Ourense, Pontevedra e Vigo; o ámbito territorial será delimitado pola respectiva provincia, agás as delegacións de Pontevedra e Vigo, correspondéndolle á Delegación Territorial de Pontevedra todos os concellos da provincia coa excepción de Vigo, Baiona, Gondomar e Nigrán os cales conforman o ámbito territorial da Delegación de Vigo.
2. Á fronte de cada delegación territorial existirá un delegado do que dependerán todos os servizos, unidades ou centros da consellería que se sitúen no ámbito territorial da súa competencia.
3. Os delegados territoriais dependen orgánica e funcionalmente do conselleiro, sen prexuízo das directrices que, na orde funcional, poidan emanar do secretario xeral e do Patrimonio e dos directores xerais da consellería.

No seu ámbito de actuación, cada delegación territorial terá, ademais das competencias previstas no Decreto 5/1987, do 14 de xaneiro, e as derivadas da desconcentración de competencias, efectuada en virtude dos decretos 87/1990 e 88/1990, ambo os dous do 15 de febreiro, as seguintes:

1. Velar polo cumprimento das disposicións legais relativas ás competencias da Consellería de Economía e Facenda.
2. O control, seguimento e a inspección das oficinas liquidadoras do seu ámbito territorial.
3. A concesión de adiamentos e fraccionamentos dentro dos límites fixados polas disposicións vixentes.
4. O exercicio das funcións propias da Tesouraría así como as que correspondan á Caixa Xeral de Depósitos.
5. A proposta, posta en práctica e o control de execución de plans e programas de actuación da Consellería de Economía e Facenda, e elaboración de estudos e informes de carácter xeral ou sectorial necesarios para eles.
6. O asesoramento sobre todas as cuestións da súa competencia que lle sometan os órganos centrais da consellería.
7. Elaborar o anteproxecto de orzamentos da delegación, así como emitir informe sobre as actuacións da consellería no seu ámbito territorial.
8. O exercicio das competencias que, mediante os decretos 5/1987, do 14 de xaneiro, e 87/1990 e 88/1990, ambos os dous do 15 de febreiro, resulten desconcentradas, así como calquera outra competencia ou atribución que as leis e demais disposicións xerais lle confiran ou lle sexan delegadas polo conselleiro.

Para o cumprimento das súas funcións, as delegacións territoriais contarán coas seguintes unidades, con nivel orgánico de servizo:

1. Secretaría da delegación.
   A secretaría da delegación exercerá as seguintes funcións:
   1. A xestión de todos os asuntos relativos a persoal, habilitación, material e réxime interior.
   2. O rexistro xeral, a información ao público e o arquivo de documentos.
   3. A realización das tarefas que, relacionadas coa xestión do patrimonio da Comunidade Autónoma no ámbito territorial da delegación, lle sexan encomendadas pola Secretaría Xeral e do Patrimonio.
   4. A realización das tarefas materiais relacionadas coas funcións encomendadas ás oficinas liquidadoras do seu ámbito territorial.

      O titular da secretaría da delegación substituirá ao delegado no caso de vacante, ausencia ou enfermidade.

2. Servizo de Xestión Tributaria.
   O Servizo de Xestión Tributaria exercerá as seguintes funcións:
   1. A recepción de toda clase de declaracións, recursos, consultas e demais documentos con transcendencia tributaria, así como o seu exame e tramitación, e a realización dos requerimentos que procedan en cada caso.
   2. A comprobación formal dos datos consignados nos documentos tributarios e a realización das tarefas preparatorias para o tratamento mecanizado da información.
   3. A función de liquidación dos tributos cedidos e propios que corresponden á Consellería de Economía e Facenda.
   4. A resolución dos recursos de reposición contra actos ditados polo propio servizo.
   5. As demais funcións que poidan corresponderlle segundo a lexislación vixente.
3. Servizo de Inspección Tributaria.
   O Servizo de Inspección Tributaria exercerá as seguintes funcións:
   1. As previstas no artigo 140 da Lei xeral tributaria e no Regulamento da inspección dos tributos aprobado polo Real decreto 939/1986, do 25 de abril.
   2. As facultativas e de valoracións de bens, dereitos ou actividades así como as de confección, conservación e actualización de censos e rexistros fiscais non incluídas no punto 4.a) deste artigo.
   3. A emisión de ditames, propostas e outras actuacións facultativas.
   4. A preparación, confección e seguimento de plans de inspección .
4. Servizo de Valoracións.
   O Servizo de Valoracións exercerá as seguintes funcións:
   1. As facultativas de valoración e recoñecemento de bens, dereitos e actividades de natureza inmobiliaria, así como as de confección, conservación e actualización dos censos e rexistros fiscais correspondentes.
   2. A emisión de ditames e outras actuacións relacionadas co seu servizo.
   3. A coordinación e o control das valoracións que se realicen nas distintas oficinas liquidadoras.
5. Intervención Territorial-Delegada.
   1. Integrada organicamente na delegación territorial da Consellería de Economía e Facenda, a Intervención Territorial, como órgano delegado da Intervención Xeral, da que dependerá funcionalmente, exercerá no ámbito das competencias das delegacións provinciais ou territoriais das respectivas consellerías ou das xefaturas ou delegacións provinciais ou territoriais dos organismos autónomos, as seguintes funcións:
      1. A función interventora respecto de todos os actos, documentos e expedientes dos que puidesen derivarse dereitos e obrigas de contido económico.
      2. A interposición de recursos e reclamacións e a emisión dos informes previstos nas disposicións vixentes.
      3. Solicitar dos órganos competentes o asesoramento xurídico ou os informes técnicos que se precisen en función da natureza do acto.
      4. Levar e desenvolver a contabilidade do seguimento do orzamento de gastos e ingresos.
      5. Levar a contabilidade dos ingresos e pagamentos non orzamentarios.
      6. Formar os estados e contas que lles teñan que render os delegados territoriais ou provinciais ao Consello de Contas de Galicia e ao Tribunal de Contas do Estado a través da Intervención Xeral.
      7. Subministrar información para os delegados e directores provinciais.
   2. Á fronte da Intervención Territorial existirá, con nivel orgánico de xefe de servizo A, un interventor territorial delegado perante a Administración territorial ou provincial.
   3. O interventor territorial delegado poderá estar asistido polos seguintes interventores habilitados, con nivel orgánico de xefe de servizo B:
      • Un interventor habilitado de organismos autónomos.
      • Un interventor habilitado de Administración xeral.
   4. Serán funcións dos interventores habilitados as seguintes:
      1. Asistir no ámbito das súas funcións ao interventor territorial delegado.
      2. Preparar e propoñerlle ao interventor territorial delegado os informes fiscais que proceda emitir en relación cos expedientes recibidos.
      3. O estudo e a proposta ao interventor territorial delegado de cantos actos competan en razón do exercicio da función interventora.
      4. Organizar e dirixir, de acordo coas instrucións ditadas polo interventor territorial delegado, as tarefas que correspondan en cada área e calquera outra función que, no ámbito da súa competencia, lle sexa encomendada polo interventor territorial delegado.
6. Servizo de Recadación.
   O Servizo de Recadación exercerá as seguintes funcións:
   1. A xestión recadatoria nos seus dous períodos.
   2. Ditar providencias de constrinximento.
   3. A relación coas entidades colaboradoras na recadación, sen prexuízo daquelas que correspondan a outros órganos.
   4. A tramitación e proposta de resolución dos expedientes de aprazamentos e fraccionamentos de pagamento.

• Secretaría da delegación |
• Servizo de Xestión Tributaria |
• Servizo de Inspección Tributaria |
• Servizo de Valoracións |
• Intervención Territorial-Delegada |
• Servizo de Recadación