DECRETO LEXISLATIVO 1/1999, DO 7 DE OUTUBRO, POLO QUE SE APROBA O TEXTO REFUNDIDO DA LEI DE RÉXIME FINANCEIRO E ORZAMENTARIO DE GALICIA

TÍTULO V.
Do control interno e da contabilidade

CAPÍTULO I.
Do control interno

Sección primeira.- Aspectos xerais

Artigo 93º.- Control interno da actividade económico-financeira.

1. O control interno da actividade económico-financeira da Comunidade, dos seus organismos autónomos e entes públicos e das sociedades públicas exercerao a Intervención Xeral (160), sen prexuízo das competencias do Consello de Contas de Galicia (161) e, se é o caso, do Tribunal de Contass (162).
2. A Intervención Xeral da Comunidade Autónoma exercerá as súas funcións de control interno con plena autonomía respecto dos órganos responsables da xestión controlada.

(160) Sobre a súa estructura e funcións, véxase o artigo 5 do Decreto 115/2004, do 3 de xuño, polo que se establece a estructura orgánica da Consellería de Economía e Facenda (D.O.G. nº 113, do 14 de xuño), modificado polo Decreto 247/2004, do 21 de outubro (D.O.G. nº 211, do 29 de outubro).

(161) Véxase o artigo 53.2 do Estatuto de Autonomía para Galicia. Así mesmo, a Lei 6/1985, do 24 de maio, do Consello de Contas (D.O.G. nº 130, do 9 de xullo), modificada pola Lei 4/1986, do 26 de decembro (D.O.G. nº 4, do 8 de xaneiro de 1987), a resolución do Parlamento de Galicia do 25 de xuño de 1992 pola que se dispón a publicación do Regulamento de réxime interior do Consello de Contas de Galicia (D.O.G. nº 138, do 17 de xullo), así como a Orde da Consellería de Economía e Facenda do 3 de maio de 1999 pola que se regula o procedemento para lle librar ó Consello de Contas as dotacións ás que se refire a disposición adicional 8ª da Lei 11/1996, do 30 de decembro, e o procedemento de remisión á Facenda autonómica de determinados ingresos (D.O.G. nº 90, do 12 de maio).

(162) Téñanse en conta os artigos 136 e 153.d) da Constitución. Así mesmo, a Lei Orgánica 2/1982, do 12 de maio, do Tribunal de Contas (B.O.E. nº 121, do 21 de maio) e a Lei 7/1988, do 5 de abril, de funcionamento do Tribunal de Contas (B.O.E. nº 84, do 7 de abril), modificada pola Lei 31/1991, do 30 de decembro (B.O.E. nº 313, do 31 de decembro) e pola Lei 22/1993, do 29 de decembro (B.O.E. nº 313, do 31 de decembro).

Artigo 94º.- O seu exercicio.

1. O exercicio do control interno realizarase a través da función interventora e do control financeiro (163).
2. A función interventora ten por obxecto controlar tódolos actos, documentos e expedientes da Comunidade e dos seus organismos autónomos dos que puidesen derivarse dereitos e obrigas de contido económico, así como os ingresos e pagamentos que deles se deriven e, en xeral, a recadación, o investimento ou a aplicación dos fondos públicos, co fin de asegurar que a xestión dos órganos controlados se axuste ás disposicións aplicables a cada caso.
3. O control financeiro exercerao a Intervención Xeral de conformidade co prevido en cada caso e na forma que regulamentariamente se estableza respecto dos servicios da Comunidade, dos organismos autónomos, dos entes públicos e das sociedades públicas para comproba-lo seu adecuado funcionamento tanto no aspecto organizativo coma no económico-financeiro (164).
   Así mesmo exercerase o control financeiro respecto das sociedades mercantís, empresas, entidades e particulares por razón das subvencións, créditos, avais e demais axudas da Comunidade ou dos seus organismos autónomos, concedidos con cargo ós orzamentos xerais da Comunidade. Neste caso o control financeiro terá por obxecto comproba-la adecuada e correcta obtención e utilización das indicadas subvencións e axudas e mailo cumprimento dos obxectivos que con elas se pretenden alcanzar (165).
4. Malia o disposto na alínea 3 deste artigo, por acordo da Xunta de Galicia, por proposta do conselleiro de Economía e Facenda, poderá establecerse o control interno realizado a través da función interventora (166) en organismos autónomos, sociedades e entes públicos.

(163) Sobre a función interventora, véxanse os artigos 95 e seguintes desta lei. Sobre o control financeiro, os artigos 103 e seguintes.

(164) Este apartado está complementado, en relación ás fundacións, co artigo 11 da Lei 10/1996, do 5 de novembro, de actuación de entes e empresas nas que tén participación maioritaria a Xunta de Galicia, en materia de persoal e contratación (D.O.G. nº 227, do 2 de novembro).

(165) En relación ás subvencións e ós avais deben terse en conta, respectivamente, os artigos 78 e 79 da presente lei, por unha banda, e 40 a 45 por outra.

(166) O Consello da Xunta de Galicia adoptou o 29 de marzo de 1996 un acordo polo que se establece o control interno a través da función interventora no IGAPE e no ente público Portos de Galicia.

| |

Sección segunda.- Da función interventora

Artigo 95º.- Fases.

1. A función interventora exercerase (167) a través das seguintes fases:
   1. A fiscalización ou intervención previa de todo acto, documento ou expediente susceptible de producir dereitos e obrigas de contido económico ou movemento de fondos e valores.
   2. A intervención formal do ordenamento do pagamento.
   3. A intervención material do pagamento.
   4. A intervención da aplicación das cantidades destinadas a obras, subministracións, adquisicións e servicios, que comprenderá o exame documental e, se é o caso, a comprobación material.
2. Son inherentes á función interventora as seguintes competencias:
   1. Interpoñer recursos e reclamacións nos supostos recollidos nas disposicións vixentes.
   2. Solicitar dos órganos competentes o asesoramento xurídico ou os informes técnicos que se precisen en función da natureza do acto, documento ou expediente intervido, así como os antecedentes e documentos necesarios para o exercicio da dita función.

(167) Téñase en conta a Circular 6/1986, do 28 de novembro, da Intervención Xeral da Comunidade Autónoma de Galicia, sobre tramitación de documentos contables e exercicio da función interventora (D.O.G. nº 10, do 16 de xaneiro de 1987).

Artigo 96º.- Principios.

1. A función interventora exercerase conforme os principios de autonomía funcional, exercicio desconcentrado, xerarquía interna e actuación contradictoria.
2. O exercicio da función interventora organizarase de forma desconcentrada a través das intervencións delegadas situadas ou próximas ós órganos sometidos a control. O interventor xeral da Comunidade poderá avoca-lo exercicio da función respecto de calquera acto ou expediente que estime oportuno.
   Regulamentariamente establecerase a competencia dos interventores delegados do interventor xeral da Comunidade (168).

(168) En relación ás funcións das intervencións delegadas, téñanse en conta o artigo 5º.4.6 do Decreto 115/2004, do 3 de xuño, polo que se establece a estructura orgánica da Consellería de Economía e Facenda (D.O.G. nº 113, do 14 de xuño).

Artigo 97º.- Intervención limitada.

1. Non estarán sometidos a intervención previa:
   1. Os gastos de obras, de xestión de servicios públicos, de subministración, de consultoría e asistencia e dos servicios, por importe inferior ó que de se-lo caso se estableza na Lei de orzamentos de cada ano (169).
   2. Os gastos de carácter períodico e demais de tracto sucesivo, unha vez intervido o gasto correspondente ó periodo inicial do acto ou contrato do que deriven, ou as súas modificacións, así como aqueloutros gastos que de acordo coa normativa vixente se fagan efectivos a través do sistema de anticipos de caixa fixa.
   3. A autorización e disposición das subvencións que figuren nos orzamentos con asignación nominativa (170).
2. A Xunta de Galicia poderá acordar, logo de informe da Intervención Xeral da Comunidade Autónoma, que a intervención previa en cada unha das consellerías ou nos seus distintos servicios, organismos autónomos ou sociedades e entes públicos se limite (171) a comproba-los extremos seguintes:
   1. A existencia de crédito orzamentario e que este é o adecuado á natureza do gasto ou da obriga que se propón contraer.
      Nos casos en que se trate de contraer compromisos de gastos de carácter plurianual comprobarase, ademais, se se cumpre o preceptuado no artigo 58º desta lei.
   2. Que as obrigas ou gastos as xeran órganos competentes.
   3. Aqueloutros extremos que, pola súa transcendencia no proceso de xestión, determine o Consello da Xunta, por proposta do conselleiro de Economía e Facenda, logo de informe da Intervención Xeral da Comunidade Autónoma.
      Os interventores delegados poderán formula-las observacións complementarias que consideren convenientes, sen que estas teñan, en ningún caso, efectos suspensivos na tramitación dos expedientes correspondentes.
3. O disposto no número anterior non será de aplicación respecto das obrigas ou dos gastos de contía indeterminada e daqueloutros que deban ser aprobados polo Consello da Xunta (172).
4. As obrigas ou os gastos sometidos á fiscalización limitada a que se refire o número 2 deste artigo serán obxecto doutra plena con posterioridade, exercida sobre unha mostra representativa dos actos, documentos ou expedientes que deron orixe á referida fiscalización, mediante a aplicación de técnicas de mostraxe ou auditoría, co fin de verificar que se axustan ás disposicións aplicables en cada caso e determina-lo grao de cumprimento da legalidade na xestión dos créditos.
   Os interventores delegados que realicen as fiscalizacións con posterioridade deberán emitir informe escrito no que fagan constar cantas observacións e conclusións se deduzan delas. Estes informes remitiránselle ó titular da consellería para que formule, se é o caso, e no prazo de quince días, as alegacións que considere oportunas, e posteriormente elevaránselle á Intervención Xeral da Comunidade Autónoma.
   A Intervención Xeral da Comunidade Autónoma daralles conta ó Consello da Xunta e ós centros directivos que resulten afectados dos resultados máis importantes da fiscalización realizada con posterioridade, e, se é o caso, propoñerá as actuacións que resulten aconsellables para asegurar que a administración dos recursos públicos se axuste ás disposicións aplicables en cada caso.
5. Con independencia do disposto no número anterior, o conselleiro de Economía e Facenda, por proposta do interventor xeral da Comunidade Autónoma, poderá acordar en qué casos a función interventora será exercida sobre unha mostra e non sobre o total de actos, documentos ou expedientes suxeitos á intervención previa (173).
   A Intervención Xeral determinará nestes casos os procedementos que se deban aplicar para a selección, a identificación e o tratamento da mostra de procedemento.
6. A fiscalización previa dos dereitos será substituída pola inherente á toma de razón en contabilidade, e estableceranse as actuacións comprobatorias posteriores que determine a Intervención Xeral da Comunidade Autónoma.

(169) Apartado modificado polo artigo 14 da Lei 9/2003, do 23 de decembro, de medidas tributarias e administrativas (D.O.G. nº 251, do 29 de decembro). A súa redación anterior era:

1. Os gastos de obras, de xestión administrativa, de subministración, de consultoría e asistencia e dos servicios, por importe inferior ó que se é o caso se estableza na Lei de orzamentos de cada ano.

Véxase para o ano 2005 o artigo 33 da Lei 13/2004, do 29 de decembro, que fixa este importe en 6.600 euros.

(170) Apartado modificado polo artigo 7 da Lei 5/2000, do 28 de decembro, de medidas fiscais e de réxime orzamentario e administrativo (D.O.G. nº 251, do 29 de decembro). A súa redacción anterior era:

Non estarán sometidos a intervención previa os gastos en material non inventariable, subministracións menores, así como os de carácter periódico e demais de tracto sucesivo, unha vez intervido o gasto correspondente ó período inicial do acto ou contrato do que se deriven ou as súas modificacións, así como aqueloutros gastos que de acordo coa normativa vixente se fagan efectivos a través do sistema de anticipos de caixa fixa. Así mesmo, tampouco estarán suxeitas a intervención previa as subvencións que figuren nos orzamentos con asignación nominativa.

(171) Véxase a Resolución da Consellería de Economía e Facenda pola que se ordena a publicación do acordo do Consello da Xunta de Galicia do 18 de marzo de 1999, no que se lle dá aplicación á previsión do artigo 97 da Lei 11/1992, do 7 de outubro, de réxime financeiro e presupostario de Galicia, respecto do exercicio da intervención limitada previa (D.O.G. nº 82, do 30 de abril. Corrección de erros no D.O.G. nº 103, do 1 de xuño).

(172) Véxase o artigo 36 da Lei 13/2004, do 29 de decembro, de orzamentos xerais da Comunidade Autónoma de Galicia para o ano 2005 (D.O.G. nº 253, do 30 de decembro).

(173) Véxase a Orde da Consellería de Economía e Facenda do 23 de novembro de 1999 sobre o exercicio da función interventora polo procedemento de mostraxe (D.O.G. nº 235, do 7 de decembro. Corrección de erros no D.O.G. nº 245, do 22 de decembro).

Artigo 98º.- Documentación e prazo.

1. A Intervención exercerá a función interventora á vista do expediente orixinal completo unha vez reunidos tódolos xustificantes e emitidos os informes preceptivos e que estea, polo tanto, en disposición de que se dicte acordo por quen corresponda.
2. O expediente será fiscalizado no prazo de dez días contados a partir do seguinte ó da data de recepción, que se reducirá a cinco días computados de igual forma cando se declarase urxente a tramitación do expediente ou se aplicase o réxime especial de fiscalización previsto no número 2 do artigo 97º.
3. Cando a Intervención faga uso da facultade a que se refire a alínea b) do número 2 do artigo 95º, suspenderase o prazo mencionado no número 2 anterior, debendo darlle conta da dita circunstancia ó órgano xestor propoñente do gasto.

Artigo 99º.- Reparos e reclamacións.

1. Se a Intervención se manifestase en desacordo co fondo ou coa forma dos actos, expedientes ou documentos examinados, deberá formula-los seus reparos por escrito. Os ditos reparos deberán ser motivados con razoamentos fundados en normas que apoien o criterio sustentado e deberán conter tódalas obxeccións realizadas ó expediente.
2. Cando a desconformidade se refira ó recoñecemento ou á liquidación de dereitos a favor da Facenda da Comunidade Autónoma, as observacións formularanse en notas de reparos e, en caso de subsisti-la discrepancia, mediante a interposición dos recursos ou das reclamacións que procedan.

Artigo 100º.- Suspensión do expediente.

1. Se os reparos afectan a autorización e disposición de gastos, o recoñecemento de obrigas ou o ordenamento de pagamentos, orixinarase a suspensión da tramitación do expediente, ata que aqueles non sexan emendados nos seguintes casos:
   1. Cando se baseen na insuficiencia ou inadecuación do crédito ó que se lle propoña imputa-lo gasto, a obriga ou o pagamento.
   2. Cando se aprecien graves irregularidades na documentación xustificativa das ordes de pagamento ou non se acredite suficientemente o dereito do perceptor.
   3. Cando o gasto se lle propoña a un órgano que careza de competencia para a súa aprobación.
   4. Cando se omitan no expediente requisitos ou trámites que se consideren esenciais a xuízo da Intervención ou cando esta estime que a continuación do procedemento lles puidese causar crebas económicas á Comunidade Autónoma ou a un terceiro.
   5. Cando o reparo sexa consecuencia de comprobacións de materiais de obras, subministracións, adquisicións e servicios.
2. A Intervención poderá fiscalizar favorablemente, malia os defectos que se observen no expediente, sempre que os requisitos ou os trámites incumpridos non sexan esenciais.
   Nestes supostos a eficacia da fiscalización quedará condicionada á reparación daqueles defectos con anterioridade á aprobación do expediente. O órgano xestor remitiralle á Intervención a documentación xustificativa de que se repararon os ditos defectos.
   De non repara-lo órgano xestor os defectos indicados, para a continuación do expediente considerarase formulado o correspondente reparo.
   O previsto neste número non será aplicable naqueles supostos nos que a fiscalización previa se realice de forma limitada, de conformidade co disposto no número 2 do artigo 97º da presente lei.

Artigo 101º. Discrepancia.

1. Cando o órgano ó que se dirixa o reparo o acepte, deberá repara-las deficiencias observadas e remitirlle de novo as actuacións á Intervención.
2. Cando o órgano xestor non acepte o reparo deducido, formulará discrepancia, que deberá ser motivada con citas dos preceptos legais nos que sustente o seu criterio.
   A discrepancia resolverase da seguinte forma:
   1. Se o reparo fose formulado por unha intervención delegada, corresponderalle á Intervención Xeral da Comunidade coñecer da discrepancia, e a súa resolución será obrigada para aquela.
   2. Se o reparo fose formulado pola Intervención Xeral da Comunidade ou esta confirmase en todo ou en parte o dunha intervención delegada e subsista a discrepancia, corresponderalle á Xunta de Galicia adoptar unha resolución definitiva.

Artigo 102º.- Omisións.

1. Nos supostos nos que, de acordo co disposto neste capítulo, a fiscalización previa da aprobación do gasto ou do recoñecemento da obriga fosen preceptivas e se omitisen, non se poderá recoñece-la obriga, nin tramita-lo pagamento nin intervir favorablemente estas actuacións ata que se coñeza ou resolva a dita omisión nos termos previstos neste artigo (174).
2. Se o interventor xeral da Comunidade ou os seus delegados ó coñecer un expediente observasen algunha das omisións indicadas no número anterior manifestaranllo á autoridade que iniciase aquel e emitirán ó mesmo tempo a súa opinión respecto da proposta, co fin de que, unindo este informe ás actuacións, poida o titular da consellería de que aquela proceda somete-lo actuado á decisión da Xunta de Galicia para que adopte a resolución a que houbese lugar.
   Este informe, que non terá natureza de fiscalización, poñerá de manifesto, como mínimo, os seguintes extremos:
   • As infraccións do ordenamento xurídico que, a xuízo do interventor, se producisen no momento no que se adoptou o acto de aprobación do gasto sen fiscalización ou intervención previa.
   • As prestacións que se realizasen como consecuencia do dito acto.
   • A posibilidade e conveniencia de revisión dos actos dictados con infracción do ordenamento.
   
   Os interventores delegados daranlle conta do seu informe á Intervención Xeral da Comunidade Autónoma no momento da súa emisión.
3. Se o titular da consellería acordase somete-lo expediente á decisión da Xunta de Galicia, comunicarallo ó conselleiro de Economía e Facenda, por conducto da Intervención Xeral da Comunidade, con dez días de antelación á reunión do Consello no que se coñeza o asunto.

Ó expediente unirase unha memoria que inclúa unha explicación da omisión da preceptiva fiscalización ou intervención previa e, se é o caso, as observacións que estime convenientes respecto do informe da Intervención.

A Secretaría do Consello comunicaralle á Consellería correspondente, á de Economía e Facenda e á Intervención Xeral da Comunidade o acordo adoptado sobre o expediente para a súa toma de razón e cumprimento nos seus propios termos.

(174) Véxase o artigo 2º do Decreto 63/1987, do 17 de marzo, sobre obrigas de exercicios pechados e sobre imputación a exercicio corrente de obrigas recoñecidas ou xeradas en anos anteriores (D.O.G. nº 61, do 31 de marzo).

| |

Sección terceira.- Do control financeiro

Artigo 103º.- Finalidade e principios.

1. O control financeiro ó que se refire o artigo 94 desta lei ten por finalidade procurar que a xestión económico-financeira do sector público galego se adecue ós principios de legalidade, economía, eficacia e eficiencia.
2. O control financeiro exercerase con plena autonomía e independencia respecto das autoridades e entidades das que se controle a súa xestión, e poderá realizarse en réxime ordinario ou en réxime permanente.
3. O control financeiro exercerase mediante a realización de auditorías ou outros tipos de control de conformidade co que se estableza regulamentariamente (175).

(175) Véxase o acordo do Consello da Xunta de Galicia do 18 de marzo de 1999, feito público pola Resolución da Consellería de Economía e Facenda do 31 de marzo de 1999, no que se lle dá aplicación á previsión do artigo 103 da Lei 11/1992, de réxime financeiro e presupostario de Galicia, respecto do control financeiro (D.O.G. nº 82, do 30 de abril. Corrección de erros no D.O.G. nº 103, do 1 de xuño).

Artigo 104º.- Auditorías e clases.

1. As auditorías a que se refire o artigo anterior consistirán na comprobación posterior da actividade económico-financeira do ente controlado, realizada de forma sistemática e mediante a aplicación de determinados procedementos de revisión a operacións ou actos singulares seleccionados para o efecto.
2. As ditas auditorías, en función dos obxectivos e do alcance que para cada control se establezan, poderán ser das seguintes clases:
   1. Auditoría financeira, que terá por obxecto a emisión dun dictame sobre se a información contable do órgano controlado se presenta de acordo cos principios, cos criterios e coas normas contables que sexan aplicables.
   2. Auditoría de cumprimento, que ten por obxecto determinar se na xestión das operacións que dean lugar a dereitos e obrigas de contido económico, na xestión dos ingresos e pagamentos e mais na recadación, custodia, investimento ou aplicación en xeral dos recursos se cumpriu coa legalidade e coas normas e directrices, internas ou externas, que resulten aplicables.
   3. Auditoría operativa, o obxecto da cal é a avaliación da eficacia e a eficiencia alcanzadas na xestión dos recursos públicos adscritos a unha entidade para o cumprimento dos seus obxectivos. Este sistema de auditoría será o utilizado para a avaliación do grao de cumprimento dos obxectivos físicos e financeiros previstos nos programas de gasto.
   4. Auditorías de sistemas e procedementos, a finalidade das cales é recomendar e propoñer melloras e modificacións parciais ou xerais, nos procedementos de xestión económico-financeira, sobre a base das posibles debilidades ou disfuncionalidades detectadas na súa revisión.

Artigo 105. Iniciación e desenvolvemento.

1. O control financeiro ordinario iniciarase por acordo do interventor xeral da Comunidade, quen delimitará a clase e o alcance do control que se vai efectuar, e desenvolverase directamente por medio de funcionarios ou equipos de control destacados temporalmente para o efecto e dirixido por interventores dependentes do interventor xeral.
2. O control financeiro permanente realizarase de acordo coas seguintes características:
   1. Exercerao a Intervención Xeral da Comunidade a través das intervencións delegadas nos servicios, organismos, sociedades e entes públicos nos que se encontre establecido este réxime de control, sen prexuízo das actuacións de control ordinario que, con carácter excepcional e alcance limitado, poida realizar directamente o citado centro directivo.
   2. As actuacións e os traballos necesarios para o seu desenvolvemento efectuaranse de forma permanente e continuada ó longo dos diferentes exercicios, e non se requirirá acordo expreso da Intervención Xeral da Comunidade Autónoma para a súa iniciación.
   3. As ditas actuacións realizaranse, como regra xeral, sobre a base do principio de proximidade temporal respecto da actividade ou dos actos obxecto de control.
   4. A Intervención Delegada encargada do control financeiro permanente deberá recibir información permanente, actualizada e detallada da actividade obxecto de control, dos seus obxectivos e do avance no seu cumprimento, na forma e coa periodicidade que a dita oficina determina, co fin de ter un coñecemento completo dela.

Artigo 106º.- Ámbito de aplicación.

1. O control financeiro permanente será aplicable nos seguintes entes do sector público de Galicia, sempre que, de conformidade co disposto no número 4 do artigo 94º desta lei, non estea establecida a función interventora:
   1. Os organismos autónomos da Comunidade de carácter industrial, comercial, financeiro ou análogo.
   2. O ente público Radiotelevisión de Galicia (176).
   3. As consellerías, servicios, organismos autónomos de carácter administrativo, sociedades e entes públicos (177), calquera que sexa a súa denominación e forma xurídica, en que así se determine, de conformidade co previsto no punto seguinte.
2. A aplicación do réxime de control financeiro permanente ás consellerías, servicios, organismos, sociedades e entes nos que actualmente non se encontre establecido efectuarase:
   1. Mediante orde do conselleiro de Economía e Facenda por proposta da Intervención Xeral da Comunidade, nos supostos de consellerías, servicios ou organismos autónomos nos que xa exista Intervención Delegada.
   2. Mediante acordo da Xunta por proposta do conselleiro de Economía e Facenda, nos supostos de servicios, sociedades ou entes públicos nos que non exista Intervención Delegada da Intervención Xeral da Comunidade.
3. A relación de dependencia e as condicións de funcionamento dos interventores delegados no exercicio do control financeiro permanente serán as mesmas cás vixentes para a función interventora.
4. Para a aplicación do disposto neste artigo as intervencións delegadas encargadas do control financeiro permanente poderán requirir información referida a:
   1. Dereitos e obrigas, compras e vendas.
   2. Investimentos e outros contratos
   3. Cobros e pagamentos.
   4. Composición e detalle de saldos en contabilidade.
   5. Operacións que se vaian realizar ou en curso de especial significación ou importancia.
   6. Existencias de fondos, de materiais e de bens de calquera natureza.
   7. Calquera outro aspecto financiero ou organizativo que se considere de interese en atención ás características do ente controlado.
      As intervencións delegadas deberán recibir un exemplar das contas e doutros estados anuais, así como dos que se elaboren con outra periodicidade, e terán acceso directo ós sistemas de información dos que se deriven as ditas contas e estados.
5. Se no exercicio do control financeiro permanente se puxesen de manifesto graves irregularidades, daráselle conta á Intervención Xeral, propoñendo, se é o caso, a substitución dese procedemento de control polo exercicio da función interventora.
6. Os interventores delegados deberán elaborar para cada ente un plan anual de actuación, que se someterá á aprobación da Intervención Xeral da Comunidade.
   O dito plan conterá o detalle das actuacións que se van realizar e o seu calendario de execución, así como a periodicidade dos informes e das datas previstas de emisión.
   Os plans de actuación incluirán, en todo caso, a realización de:
   1. Auditoría permanente de cumprimento.
   2. Revisións de rexistros e procedementos contables e das existencias e dos movementos de fondos.
   3. Auditoría financeira das contas anuais.
   4. Auditoría de programas sobre o nivel de realización de obxectivos e análises das causas das desviacións.
      Os citados plans incluirán ademais, se procede, a realización doutras auditorías operativas, de sistemas e procedementos ou outros tipos de control dos previstos no artigo 104 desta lei, nos casos e co alcance nos que así se determine.

(176) Téñase presente o Decreto 480/1990, do 10 de outubro, sobre control financeiro, réxime presupostario e contable do ente público C.R.TV.G. e as súas sociedades (D.O.G. nº 210, do 25 de outubro).

(177) Véxase a Resolución da Consellería de Economía e Facenda do 29 de xaneiro de 1993 pola que se ordena a publicación do acordo do Consello da Xunta de Galicia do 28 de xaneiro de 1993, no que se establece o control financeiro permanente do IGAPE (D.O.G. n º 22, do 3 de febreiro).

Artigo 107º.- Plan anual de auditorías.

1. O control financeiro ordinario enmarcará a súa actuación nun plan anual de auditorías que se debe realizar en cada exercicio, a elaboración do cal lle corresponde á Intervención Xeral da Comunidade.
2. O plan comprenderá as entidades sobre as que se realizarán controis financeiros de carácter ordinario no exercicio económico a que se refira, con indicación, en cada caso, do tipo de control que se debe realizar e do seu alcance.
3. O plan terá carácter aberto e poderá ser modificado para a realización de controis específicos, en atención ós medios dispoñibles e por outras razóns debidamente ponderadas.
4. Para o desenvolvemento do control financeiro ordinario, a Intervención Xeral da Comunidade poderá solicita-la colaboración de empresas privadas de auditorías, que deberán axustarse ás normas e instruccións que determine o dito centro directivo.
   Para solicita-la dita colaboración será necesaria unha orde do conselleiro de Economía e Facenda, na que se especificará a insuficiencia dos servicios da Intervención Xeral da Comunidade que xustifique a dita colaboración.

Artigo 108º.- Resultado e informes.

1. Do resultado das actuacións de control financeiro ordinario ou permanente emitirase informe coa estructura, co procedemento e co contido que regulamentariamente se determine.
2. Os informes derivados das actuacións de control financeiro ordinario elevaránselle á Intervención Xeral da Comunidade para a súa remisión ó conselleiro de Economía e Facenda e ós órganos responsables e de tutela dos servicios ou organismos controlados.
3. Os informes que teñan a súa orixe en actuacións de control financeiro permanente remitiránselle ó titular da xestión e ademais á Intervención Xeral da Comunidade cando estes teñan un carácter xeral ou fosen realizados por algunha circunstancia especial.

| |

CAPÍTULO II.
Da contabilidade (178)

(178) Téñase en conta a Orde da Consellería de Economía e Facenda do 28 de novembro de 2001 pola que se aproba o Plan Xeral de Contabilidade Pública de Galicia (D.O.G. nº 239, do 12 de decembro).

Artigo 109º.- Réxime.

1. A administración da Comunidade Autónoma (179), dos seus organismos autónomos (180) e das sociedades públicas (181) de Galicia queda sometida ó réxime de contabilidade pública nos termos previstos nesta lei.
2. A suxeición ó réxime de contabilidade pública comporta a obriga de renderlles contas das respectivas operacións e transaccións económicas, calquera que sexa a súa natureza, ó Tribunal de Contas e ó Consello de Contas de Galicia (182).
3. O disposto no parágrafo anterior élles aplicable ó emprego dos fondos para xustificar (183) e ó das transferencias correntes e de capital con cargo ós orzamentos xerais da Comunidade Autónoma, calquera que sexa o seu perceptor.
4. As obrigas que se determinen no presente artigo entenderanse sen prexuízo das facultades que a Constitución lle confire ó Tribunal de Contas.

(179) Ademáis da Orde do 28 de novembro de 2001 pola que se aproba o Plan Xeral de Contabilidade Pública de Galicia, véxase a Orde da Consellería de Economía e Facenda do 1 de decembro de 1989 pola que se implanta un novo sistema de información contable na Administración da Xunta de Galicia (D.O.G. nº 238, do 14 de decembro), vixente en canto non se opoña á anterior, modificada polas Ordes do 31 de maio de 1994 (D.O.G. nº 115, do 16 de xuño), do 1 de febreiro de 1999 (D.O.G. nº 28, do 11 de febreiro) e do 23 de novembro de 1999 (D.O.G. nº 234, do 3 de decembro).
Véxase tamén a Orde da Consellería de Economía e Facenda do 26 de decembro de 1986 pola que se aproba a instrucción provisoria de contabilidade do gasto público da Comunidade Autónoma de Galicia (D.O.G. nº 8, do 14 de xaneiro de 1987), vixente en canto non se opoña á citada orde do 28 de novembro de 2001 pola que se aproba o Plan Xeral de Contabilidade Pública de Galicia.
Téñase en conta, así mesmo, a Orde conxunta das Consellerías da Presidencia e Administración Pública e de Economía e Facenda do 20 de maio de 1991 pola que se aproban instruccións provisionais sobre a contabilización e xestión de créditos desconcentrados (D.O.G. nº 96, do 22 de maio. Corrección de erros no D.O.G. nº 136, do 17 de xullo).
Finalmente, a Orde da Consellería de Economía e Facenda do 21 de decembro de 2001 pola que se regula o traspaso dunha contabilidade en pesetas a unha contabilidade en euros na Administración xeral da Comunidade Autónoma e demais entidades suxeitas ó réxime de contabilidade pública (D.O.G. nº 250, do 28 de decembro).

(180) A Orde da Consellería de Economía e Facenda do 28 de novembro de 2001 pola que se aproba o Plan Xeral de Contabilidade Pública de Galicia (D.O.G. nº 239, do 12 de decembro) aplícase tamén ós organismos autónomos ós que se refire o artigo 11 desta Lei.

(181) A Orde da Consellería de Economía e Facenda do 28 de novembro de 2001 pola que se aproba o Plan Xeral de Contabilidade Pública de Galicia (D.O.G. nº 239, do 12 de decembro) aplícase ás sociedades públicas autonómicas a que se refire o artigo 12 desta Lei, sometidas ó réxime de contabilidade pública, de acordo coa súa normativa específica.
Téñase presente o Decreto 480/1990, do 10 de outubro, sobre control financeiro, réxime presupostario e contable do ente público C.R.TV.G. e as súas sociedades (D.O.G. nº 210, do 25 de outubro).

(182) Sobre a regulación do Tribunal de Contas e do Consello de Contas de Galicia, véxanse as notas do artigo 93.1 desta lei.

(183) Artigo 77 desta lei.

Artigo 110º.- Competencias da Consellería de Economía e Facenda.

É competencia da Consellería de Economía e Facenda a organización da contabilidade pública ó servicio dos seguintes fins:

1. Rexistra-la execución dos orzamentos xerais da Comunidade nas súas distintas fases.
2. Coñece-lo movemento e a situación da Tesourería.
3. Reflecti-las variacións, a composición e a situación do patrimonio da Comunidade e do inventario de bens afectados ós fins dos organismos autónomos e das sociedades públicas.
4. Proporcionárlle-los datos necesarios para a formación e o rendemento da Conta Xeral da Comunidade, así como das demais contas, estados e documentos que deban elaborarse ou remitirse ó Consello de Contas de Galicia e ó Tribunal de Contas.
5. Facilita-los datos e outros antecedentes necesarios para a confección das contas económicas do sector público estatal.
6. Rende-la información económica e financeira que sexa necesaria para a toma de decisións tanto na orde política coma na de xestión.

Artigo 111º.- Funcións da Intervención Xeral como centro directivo.

A Intervención Xeral da Comunidade Autónoma é o centro directivo da contabilidade pública de Galicia e correspóndenlle as seguintes funcións (184):

1. Someter á decisión do conselleiro de Economía e Facenda o Plan de contabilidade pública de Galicia, ó que se adaptarán os organismos, as corporacións (185) e as demais entidades comprendidas no sector público de Galicia, mantendo a debida coordinación co Plan xeral de contabilidade pública.
2. Promove-lo exercicio da potestade regulamentaria (186) no tocante á determinación da estructura, xustificación, tramitación e rendemento de contas, informes e demais documentos relativos á contabilidade pública, podendo dictar para o efecto circulares e instruccións polos procedementos que se determinen nas leis e nos regulamentos.
3. Aproba-los plans parciais ou especiais de contabilidade pública que se elaboren conforme o Plan de contabilidade pública de Galicia, ou o Plan xeral de contabilidade do sector privado, respecto das sociedades públicas.
4. Inspecciona-la contabilidade de toda clase de organismos públicos da Comunidade Autónoma.

(184) Véxase o artigo 5 do Decreto 115/2004, do 3 de xuño, polo que se establece a estructura orgánica da Consellería de Economía e Facenda (D.O.G. nº 113, do 14 de xuño).

(185) Véxase a Orde da Consellería de Economía e Facenda do 28 de novembro de 2001 pola que se aproba o Plan Xeral de Contabilidade Pública de Galicia (D.O.G. nº 239, do 12 de decembro), aplicable tamén ás corporacións e outras entidades comprendidas no sector público de Galicia.

(186) Téñase en conta a orde anual da Consellería de Economía e Facenda na que se regulan as operacións de peche de cada exercicio económico en relación coa contabilidade dos gastos públicos.

Artigo 112º.- Funcións como centro xestor.

1. Como centro xestor da contabilidade pública, correspóndelle á Intervención Xeral:
   1. Forma-la Conta Xeral da Comunidade Autónoma e elabora-la memoria que a acompaña.
   2. Preparar e examina-las contas que se lles deban render ó Consello de Contas de Galicia e ó Tribunal de Contas, e formula-las observacións que, se é o caso, se estimen necesarias.
   3. Solicita-la presentación de contas, estados e outros documentos suxeitos a exame crítico.
   4. Centraliza-la información deducida da contabilidade das corporacións, organismos, entidades e demais axentes que integran o sector público de Galicia.
   5. Elabora-las contas económicas do sector público de Galicia, de acordo co sistema de contas en vigor para todo o Estado.
   6. Vixiar e impulsa-las actividades das oficinas de contabilidade de tódolos organismos e servicios da Comunidade.
2. Tódolos informes e dictames económico-contables que deban emiti-las entidades sometidas ó réxime de contabilidade pública deberán ser solicitados a través da Intervención Xeral da Comunidade Autónoma.
3. Para os efectos previstos neste artigo, o rendemento de toda clase de contas polos procedementos ordinarios deberase realizar a través da Intervención Xeral.

Artigo 113º.- Soporte documental.

A contabilidade pública levarase en libros, rexistros e contas, segundo os procedementos técnicos establecidos que sexan máis convenientes pola índole das operacións e das situacións que neles deban anotarse, sen prexuízo de que as sociedades públicas se axusten ás disposicións do Código de comercio, ás que se dicten no seu desenvolvemento e ó Plan xeral de contabilidade vixente para as empresas españolas (187).

(187) Téñase presente o Real Decreto 1643/1990, do 20 de decembro, polo que se aproba o Plan Xeral de Contabilidade (B.O.E. nº 310, do 27 de decembro. Corrección de erros no B.O.E. nº 63, do 14 de marzo de 1991). Derrogado parcialmente, na súa disposición final sétima, pola disposición derrogatoria 1.24 da Lei 43/1995, do 27 de decembro, do imposto sobre sociedades (B.O.E. nº 310, do 28 de decembro) e na norma de valoración 14º , pola Orde do Ministerio de Economía do 18 de decembro de 2001 (B.O.E. nº 306, do 22 de decembro).
Téñase en conta tamén a Orde do Ministerio de Hacienda do 19 de outubro de 2001 pola que se regula a transición dunha contabilidade en pesetas a unha contabilidade en euros na Administración Xeral do Estado e naqueles organismos públicos sometidos ó Plan Xeral de Contabilidade Pública (B.O.E. nº 260, do 30 de outubro).

Artigo 114º.- Contadantes.

Serán contadantes das contas que teñan que renderse ó Consello de Contas de Galicia e, se é o caso, ó Tribunal de Contas:

1. Os funcionarios que teñan ó seu cargo a xestión dos ingresos e a realización dos gastos, así como as demais operacións da Administración da Comunidade.
2. Os presidentes ou directores dos organismos autónomos, sociedades públicas e demais entes que conforman o sector público de Galicia.
3. Os particulares que, excepcionalmente, administren, recaden ou custodien fondos ou valores da Comunidade, sen prexuízo de que sexan intervidas as respectivas operacións.
4. Os perceptores das transferencias a que se refiren os artigos 78º e 109º.3 desta lei.

Artigo 115º.- Forma e prazos.

As contas e a documentación que se lles deban render ó Consello de Contas de Galicia (188) e ó Tribunal de Contas formaranse e cerraranse por períodos trimestrais, excepto as correspondentes ós organismos autónomos, sociedades públicas e demais entes que conforman o sector público de Galicia, que o serán anualmente.

(188) Véxase a Circular da Intervención Xeral da Comunidade Autónoma do 9 de decembro de 1999 pola que se dictan normas relativas á documentación que se lle debe render ó Consello de Contas (D.O.G. nº 248, do 27 de decembro), dictada como consecuencia da aprobación da Orde da Consellería de Economía e Facenda do 23 de novembro de 1999 pola que se modifica a do 1 de decembro de 1989, sobre a implantación dun novo sistema de información contable na Xunta de Galicia (D.O.G. nº 234, do 3 de decembro de 1999).

Artigo 116º.- Sociedades públicas, entes e organismos.

A contabilidade pública das sociedades públicas, entes e organismos (189) queda sometida á verificación ordinaria e extraordinaria a cargo dos funcionarios dependentes do interventor xeral da Comunidade e dos que, se é o caso, designe o Tribunal de Contas ou o Consello de Contas.

(189) Artigos 11 e 12 desta lei.

Artigo 117º.- Publicidade e información.

1. A Consellería de Economía e Facenda publicará no Diario Oficial de Galicia os seguintes datos trimestrais:
   1. Do movemento do tesouro por operacións orzamentarias e extraorzamentarias, e da súa situación.
   2. Das operacións de execución do orzamento da Comunidade Autónoma e das súas modificacións.
   3. Das demais que se consideren de interese.
2. Os organismos autónomos, as entidades públicas e as sociedades mercantís con participación maioritaria da Xunta remitiranlle trimestralmente á Consellería de Economía e Facenda un estado da súa situación financeira, de acordo coa estructura que esta determine (190).
3. Trimestralmente, o conselleiro de Economía e Facenda daralle conta á Comisión 3ª, de Economía, Facenda e Orzamentos, do estado de execución orzamentaria.

(190) Véxase a Orde da Consellería de Economía e Facenda do 15 de setembro de 1988 pola que se establece a documentación que os organismos autónomos de carácter industrial, comercial, financeiro e análogos, entes públicos e empresas públicas deben remitir á Consellería de Economía e Facenda (D.O.G. nº 189, do 30 de setembro).
Véxase tamén a Resolución da Consellería de Economía e Facenda do 31 de marzo de 1999 pola que se ordena a publicación do acordo do Consello da Xunta de Galicia do 18 de marzo de 1999, no que se lle da aplicación á previsión do artigo 103 da Lei 11/1992, do 7 de outubro, de réxime financeiro e presupostario de Galicia, respecto do control financeiro (D.O.G. nº 82, do 30 de abril. Corrección de erros no D.O.G. nº 103 do 1 de xuño). Esta disposición foi desenvolta pola Resolución da Consellería de Economía e Facenda do 24 de maio de 1999, pola que se aproban os modelos de información trimestral e comunicación previa do gasto previstos no citado acordo do Consello da Xunta de Galicia do 18 de marzo de 1999, polo que se implanta o sistema integrado de información e control permanente de sociedades e fundacións públicas de Comunidade Autónoma de Galicia. (D.O.G. nº 107, do 7 de xuño).

| |

CAPÍTULO III.
Da Conta Xeral da Comunidade

Artigo 118º.- Documentación.

1. A Conta Xeral da Comunidade Autónoma de Galicia comprenderá tódalas operacións orzamentarias, patrimoniais e de Tesourería levadas a cabo durante o exercicio e constará dos seguintes documentos:
   1. Conta da Administración da Comunidade.
   2. Conta dos organismos autónomos de carácter administrativo.
   3. Conta dos organismos autónomos de carácter industrial, comercial, financeiro ou análogo.
   4. Conta das sociedades públicas e demais entes públicos.
   5. Conta do patrimonio da Comunidade e dos seus organismos autónomos.
2. Achegaráselle á Conta Xeral un estado no que se reflicta o movemento e a situación dos avais concedidos pola Comunidade Autónoma e polas súas sociedades públicas (191).

(191) Artigos 40 a 45 desta lei.

Artigo 119º.- Formación.

A Conta da Administración da Comunidade formarase con base nos estados e documentos que determine a Consellería de Economía e Facenda e, en particular, polos seguintes:

1. A liquidación do orzamento, especificando os créditos iniciais e as súas modificacións, así como a liquidación dos estados de ingresos e gastos nas súas distintas fases de xestión orzamentaria.
2. Un estado demostrativo dos compromisos de gastos adquiridos con cargo a exercicios futuros, facendo uso do disposto no artigo 58º desta lei.
3. Un estado demostrativo da evolución e situación dos valores que se deben cobrar e das obrigas que se deben pagar procedentes de exercicios anteriores.
4. A Conta Xeral de Tesourería que poña de manifesto a súa situación e as operacións realizadas durante o exercicio.
5. A Conta Xeral do endebedamento público.
6. O resultado do exercicio económico, que recollerá a determinación do superávit, o déficit ou nivelación da liquidación do orzamento, o remanente de Tesourería resultante e a variación dos activos e pasivos financeiros.

Artigo 120º.- Organismos autónomos.

1. Coas contas rendidas polos organismos autónomos (192) e demais documentos que se lle deban render ó Consello de Contas de Galicia e ó Tribunal de Contas, a Intervención Xeral da Comunidade elaborará estados anuais agregados que permitan ofrecer unha visión global da xestión realizada no exercicio pola totalidade daqueles.
2. Á Conta Xeral da Comunidade Autónoma unirase unha memoria na que se demostre o grao de cumprimento dos obxectivos previstos para cada un dos programas de gasto.
3. A Consellería de Economía e Facenda establecerá a estructura e o contido das contas e estados a que fai referencia o número 1 anterior, así como das contas que deban rende-los demais entes do sector público de Galicia.

(192) Artigo 11 desta lei.

Artigo 121º.- Revisión e aprobación. (193)

1. A Conta Xeral da Comunidade de cada ano formarase antes do 31 de agosto do ano seguinte ó que se refire e remitirase logo de acordo da Xunta ó Consello de Contas de Galicia e ó Tribunal de Contas dentro dos dous meses seguintes á súa formación.
2. A Conta Xeral da Comunidade Autónoma deberá ser aprobada polo Parlamento de Galicia para efectos de dar cumprimento ó disposto na alínea b) do artigo 10 do Estatuto de autonomía.

(193) Debe entenderse "remisión".

|

Volver: Sumario - Título I
| Título II
| Título III
| Título IV
| Continuar: Título VI - Disposicións

|