DECRETO LEXISLATIVO 1/1999, DO 7 DE OUTUBRO, POLO QUE SE APROBA O TEXTO REFUNDIDO DA LEI DE RÉXIME FINANCEIRO E ORZAMENTARIO DE GALICIA

Sumario

| Saltar sumario | | |

Continuar: Título II
| Título III
| Título IV
| Título V
| Título VI - Disposicións

| | |

DECRETO LEXISLATIVO 1/1999, DO 7 DE OUTUBRO, POLO QUE SE APROBA O TEXTO REFUNDIDO DA LEI DE RÉXIME FINANCEIRO E ORZAMENTARIO DE GALICIA (1)

(1) Publicado no D.O.G. nº 214, do 5 de novembro (corrección de erros no D.O.G. nº 218, do 11 de novembro). Foi modificado pola Lei 8/1999, do 30 de decembro, de medidas fiscais e orzamentarias e de función pública e actuación administrativa (D.O.G. nº 252, do 31 de decembro), pola Lei 5/2000, do 28 de decembro, de medidas fiscais e de réxime orzamentario e administrativo (D.O.G. nº 251, do 29 de decembro), pola Lei 3/2002, do 29 de abril, de medidas de réxime fiscal e administrativo (D.O.G. nº 84, do 2 de maio), pola Lei 7/2002, do 27 de decembro, de medidas fiscais e de réxime administrativo (D.O.G. nº 251 do 30 de decembro) e pola Lei 9/2003, do 23 de decembro, de medidas tributarias e administrativas e pola Lei 14/2004, do 29 de decembro, de medidas tributarias e de réxime administrativo (D.O.G. nº 253, do 30 de decembro).
De acordo co artigo 149.3, inciso final, da Constitución, a Lei 47/2003, do 26 de novembro, xeral orzamentaria (B.O.E. nº 284, do 27 de novembro) ten carácter supletorio respecto da presente lei.
Con carácter xeral, debido ós múltiples aspectos desta lei que están tratados nas leis anuais de orzamentos da Comunidade Autónoma galega, é recomendable consultar estas últimas, posto que complementan, para o exercicio económico correspondente, o contido desta lei.

A disposición adicional oitava da Lei 6/1998, do 29 de decembro, de orzamentos xerais da Comunidade Autónoma de Galicia para 1999 (2), autorizou o Goberno galego para a elaboración, no prazo dun ano, do texto refundido da Lei 11/1992, do 7 de outubro, de réxime financeiro e orzamentario de Galicia (3).

(2) Publicada no D.O.G. nº 252, do 31 de decembro de 1998.

(3) Publicada no D.O.G. nº 200, do 14 de outubro (Corrección de erros no D.O.G. nº 220, do 11 de novembro). Modificada polas Leis 14/1992, do 29 de decembro (D.O.G. nº 254, do 31 de decembro), 1/1994, do 30 de marzo (D.O.G. nº 63, do 4 de abril), 11/1995, do 28 de decembro (D.O.G. nº 249, do 30 de decembro), de orzamentos xerais da Comunidade Autónoma de Galicia para os anos 1993, 1994 e 1996, respectivamente. Posteriormente, pola Lei 2/1998, do 8 de abril, de medidas tributarias, de réxime presupostario, función pública, patrimonio, organización e xestión (D.O.G. nº 68, do 9 de abril), e pola Lei 7/1998, do 30 de decembro, de medidas tributarias, de réxime orzamentario, función pública e xestión (D.O.G. nº 252, do 31 de decembro. Corrección de erros no D.O.G. nº 29, do 12 de febreiro de 1999).

En uso da dita autorización redactouse o correspondente texto refundido, no que se incorporan ó texto inicial da Lei 11/1992 as modificacións sufridas por esta desde a súa entrada en vigor, así como algunhas actualizacións terminolóxicas e correccións gramaticais que non inciden no fondo da disposición.

En consecuencia, de acordo co previsto no artigo 10º1.a) do Estatuto de autonomía para Galicia, aprobado pola Lei orgánica 1/1981, do 6 de abril (4), e no artigo 4.4º da Lei 1/1983, do 22 de febreiro, reguladora da Xunta e do seu presidente (5), por proposta do conselleiro de Economía e Facenda, de acordo co Consello Consultivo de Galicia, e logo de deliberación do Consello da Xunta de Galicia na súa reunión do sete de outubro de mil novecentos noventa e nove,

(4) Publicado no B.O.E. nº 101, do 28 de abril de 1981.

(5) Publicada no D.O.G. nº 23, do 21 de marzo de 1983.

| |

DISPOÑO:

Artigo único.

De conformidade coa disposición adicional oitava da Lei 6/1998, do 29 de decembro, de orzamentos xerais da Comunidade Autónoma de Galicia para 1999, apróbase o texto refundido da Lei 11/1992, do 7 de outubro, de réxime financeiro e orzamentario de Galicia, que se insire a continuación.

Disposición adicional única. Remisións normativas á Lei 11/1992.

As remisións e referencias normativas á Lei 11/1992, do 7 de outubro, de réxime financeiro e presupostario de Galicia, entenderanse feitas, no sucesivo, ó texto refundido da Lei de réxime financeiro e orzamentario de Galicia.

Disposición derradeira única. Entrada en vigor.

O presente decreto lexislativo e o texto refundido que se aproba entrarán en vigor o día seguinte ó da súa publicación no Diario Oficial de Galicia.

TEXTO REFUNDIDO DA LEI DE RÉXIME FINANCEIRO E ORZAMENTARIO DE GALICIA

| |

TÍTULO PRELIMINAR.
Principios xerais

Artigo 1º.- Concepto.

1. A Facenda pública de Galicia está constituída polo conxunto de dereitos e obrigas de contido económico e financeiro dos que a súa titularidade lle corresponde á Comunidade Autónoma de Galicia (6).
2. Constitúen materias propias da Facenda pública de Galicia, con independencia da normativa que as regule, as seguintes:
   1. O procedemento orzamentario nas súas distintas fases de elaboración, xestión e liquidación (7).
   2. O sistema de contabilidade a que debe someterse a actuación económica dos órganos competentes do sector público galego (8).
   3. O réxime do seu patrimonio (9).
   4. A contratación en réxime de dereito administrativo (10).
   5. A regulación dos seus ingresos de dereito público e privado (11).
   6. As normas de asignación e xestión dos recursos públicos e o control de eficacia e eficiencia no seu emprego (12).
   7. O endebedamento e a concesión de avais e outras garantías (13).
   8. A organización e regulación da Tesourería (14).
   9. Os procedementos xerais de funcionamento dos órganos responsables da Facenda pública galega (15).
   10. As prerrogativas da Facenda pública galega e as responsabilidades derivadas da actuación dos seus órganos e do persoal ó seu servicio (16).
   11. Calquera outra que tivese relación co contido da Facenda pública galega.

(6) Artigos 14 a 27 da presente lei

(7) Artigos 46 a 86 desta lei.

(8) Artigos 109 a 117 da presente lei.

(9) Véxase a Lei 3/1985, do 12 de abril, do patrimonio da Comunidade Autónoma galega (D.O.G. nº 78, do 24 de abril), modificada polas Leis 1/1986, do 29 de outubro, 2/1988, do 5 de marzo, 13/1988, do 30 de decembro, e 11/1996, do 30 de decembro, de orzamentos xerais da Comunidade Autónoma de Galicia para os anos 1986, 1988, 1989 e 1997, respectivamente (D.O.G. nº 214, do 3 de novembro de 1986; nº 50, do 14 de marzo de 1988; nº 251, do 31 de decembro de 1988; e nº 254, do 31 de decembro de 1996, respectivamente). Ademais foi modificada pola Lei 2/1998, do 8 de abril, de medidas tributarias, de réxime orzamentario, función pública, patrimonio, organización e xestión (D.O.G. nº 68, do 9 de abril), pola Lei 7/2002, do 27 de decembro, de medidas fiscais e de réxime administrativo (D.O.G. nº 251 do 30 de decembro) e pola disposición final primeira da Lei 6/2003, do 9 de decembro, de taxas, prezos e exaccións reguladoras da Comunidade Autónoma de Galicia (D.O.G. nº 240, do 11 de decembro). Tamén se modificou, en virtude da disposición adicional 2ª, polos Decretos 185/2001, do 26 de xullo (D.O.G. nº 156, do 13 de agosto) e 180/2003, do 27 de febreiro (D.O.G. nº 52, do 14 de marzo).
Téñase en conta tamén o Decreto 50/1989, do 9 de marzo, polo que se aproba o Regulamento para a execución da Lei 3/1985 (D.O.G. nº 71, do 13 de abril. Corrección de erros no D.O.G. nº 134, do 13 de xullo de 1989), modificado polo Decreto 238/1998, do 24 de xullo (D.O.G. nº 156, do 13 de agosto) e polo Decreto 180/2003, do 27 de febreiro (D.O.G. nº 52, do 14 de marzo).
Ademais da normativa autonómica, deberán terse en conta os preceptos básicos contidos na Lei estatal 33/2003, do 3 de novembro, do patrimonio das Administracións Públicas (B.O.E. nº 264, do 4 de novembro).

(10) Véxase o Real Decreto Lexislativo 2/2000, do 16 de xuño, polo que se aproba o Texto Refundido da Lei de contratos das Administracións Públicas (B.O.E. nº 148, do 21 de xuño. Corrección de erros no B.O.E. nº 227, do 21 de setembro), modificado pola disposición transitoria segunda da Lei 14/2000, do 29 de decembro (B.O.E. nº 313, do 30 de decembro), polo art. 61 da Lei 24/2001, do 27 de decembro, de medidas fiscais, administrativas e do orde social, polo art. 71 da Lei 53/2002, do 30 de decembro, de medidas fiscais, administrativas e da orde social, pola Lei 13/2003, do 23 de maio, reguladora do contrato de concesión de obras públicas (B.O.E. nº 124, do 24 de maio), pola disposición final décimoterceira da Lei 22/2003, do 9 de xullo, concursal (B.O.E. nº 164, do 10 de xullo), polo art. 67 da Lei 62/2003, do 30 de decembro, de medias fiscais, administrativas e da orde social (B.O.E. nº 313, do 31 de decembro) e pola disposición final primeira da Lei 3/2004, do 29 de decembro, pola que se establecen medidas de loita contra a morosidade nas operacións comerciais (B.O.E. nº 314, do 30 de decembro). Debe terse en conta tamén o Regulamento xeral da Lei de contratos das Administracións Públicas, aprobado polo Real decreto 1098/2001, do 12 de outubro (B.O.E. nº 257, do 26 de outubro).
Entre a normativa autonómica, téñase en conta a Lei 10/1996, do 5 de novembro, de actuación de entes e empresas nas que ten participación maioritaria a Xunta de Galicia, en materia de persoal e contratación, modificada pola disposición adicional cuarta da Lei 14/2004, do 29 de decembro, de medidas tributarias e de réxime administrativo (D.O.G. nº 253, do 30 de decembro); e o Decreto 87/1990, do 15 de febreiro, sobre desconcentración de competencias en materia de contratación administrativa nos delegados provinciais das consellerías da Xunta de Galicia (D.O.G. nº 35, do 19 de febreiro). Así mesmo, o Decreto 198/1995, do 16 de marzo, polo que se crea o Rexistro de Contratos da Comunidade Autónoma de Galicia (D.O.G. nº 129, do 6 de xullo) e o Decreto 262/2001, do 20 de setembro, de refundición da normativa reguladora do Rexistro Xeral de Contratistas (D.O.G. nº 200, do 16 de outubro).
Tamén o Decreto 122/1996, do 8 de febreiro, sobre adxudicación de obras e subministracións polo procedemento negociado con publicidade (D.O.G. nº 61, do 26 de marzo) e o acordo do Consello da Xunta do 8 de febreiro de 1996, polo que se establecen regras de adxudicación dos contratos de obras por concurso e polo procedemento negociado na Administración da Comunidade Autónoma, publicado en virtude da Resolución do 8 de marzo de 1996 da Consellería de Economía e Facenda (D.O.G. nº 56, do 19 de marzo). Hai que ter en conta, non obstante, que a aplicación deste acordo está condicionada polo novo regulamento xeral da lei, así como polas consideracións expostas pola Comisión da Unión Europea no expediente SG (96)D 96/2009 en relación ó acordo do Consello da Xunta do 10 de maio de 1995 (D.O.G. nº 102, do 30 de maio), antecedente inmediato do actualmente vixente.

(11) Consúltense as notas do artigo 14 desta lei.

(12) Artigos 94 e 103 a 108 da presente lei.

(13) Artigos 28 a 45 desta lei.

(14) Artigos 87 a 92 da presente lei.

(15) Particularmente, téñase en conta o Decreto 34/1997, do 20 de febreiro, polo que se regula a organización, as competencias, a composición e o funcionamento do Tribunal Económico-Administrativo da Comunidade Autónoma de Galicia (D.O.G. nº 44, do 5 de marzo), que agora se denomina Xunta Superior de Facenda, segundo o disposto na disposición adicional primeira da Lei 6/2003, do 9 de decembro, de taxas, prezos e exaccións reguladoras da Comunidade Autónoma de Galicia (D.O.G. nº 240, do 11 de decembro).

(16) Sobre prerrogativas, véxanse os artigos 10 e 19 da presente lei, e sobre responsabilidades, os artigos 122 a 126 da mesma.

Artigo 2º.- Criterios e fins.

1. A distribución e xestión dos recursos públicos realizarase tendo en conta criterios de eficacia e eficiencia.
2. A acción do Goberno para a prestación de servicios públicos e a dotación de infraestructuras públicas básicas e sociais da Comunidade farase conforme os principios de equidade, solidariedade e equilibrio territorial (17).

(17) Os principios de eficacia e de eficiencia están constitucionalizados nos artigos 103.1 e 31.2, respectivamente, da Constitución. Sobre os principios de solidariedade e de equilibrio territorial téñanse en conta os artigos 2 e 158.2, respectivamente, do mesmo corpo normativo, e o artigo 2 do Estatuto de Autonomía para Galicia (B.O.E. nº 311-1, do 29 de decembro de 1978, e nº 101, do 28 de abril de 1981, respectivamente).

Artigo 3º.- Normativa reguladora.

1. Constitúe o obxecto desta lei a regulación da actividade económico-financeira da Comunidade Autónoma de Galicia, sen prexuízo do que se dispoña noutras leis especiais.
2. A actividade económico-financeira da Comunidade Autónoma de Galicia rexerase:
   1. Por esta lei e polas demais leis especiais e normas concordantes que sobre a materia dicte o Parlamento de Galicia.
   2. Polas leis de orzamentos xerais da Comunidade Autónoma.
   3. Polas normas regulamentarias que se dicten no desenvolvemento desta lei.
3. Terán carácter supletorio as demais normas do ordenamento xurídico administrativo e, no seu defecto, o dereito privado respectando a prelación de normas do dereito civil galego.
4. As leis anuais de orzamentos xerais da Comunidade Autónoma poderán conter normas relacionadas coa súa actividade económico-financeira con vixencia permanente ou con vixencia temporal superior ó período anual ó que estas correspondan.
   Cando nas ditas normas legais concorra algunha destas circunstancias deberá terse en conta o seguinte:
   1. De tratarse de normas de vixencia permanente, establecerase así de forma expresa, incluíndo, se é o caso, a táboa de derrogacións motivada pola entrada en vigor da nova norma legal.
   2. De tratarse de normas de vixencia temporal, definirase con precisión o seu prazo de vixencia e as normas de ordenamento xurídico que quedan afectadas, así como os efectos sobre estas á entrada en vigor da nova normativa ó longo do prazo no que esta sexa aplicable.

Artigo 4º.- Principios orzamentarios e control.

1. A actividade económico - financeira da Comunidade Autónoma de Galicia estará sometida ó réxime de orzamento anual e ós principios de control interno, de contabilidade e de unidade de caixa que se determinan nesta lei (18).
2. Tódalas actividades que dean lugar ó recoñecemento de dereitos e obrigas de contido económico ou ó manexo de fondos públicos deberán estar controladas ou intervidas conforme as normas desta lei e sometidas ó réxime de rendemento de contas ó Consello de Contas e ó Tribunal de Contas, de acordo coas disposicións que os regulan.
3. A Intervención Xeral da Comunidade Autónoma será o órgano encargado da execución das funcións de control interno e de contabilidade reguladas nesta lei.
4. A Comunidade Autónoma de Galicia, de acordo cos procedementos legais establecidos, poderá esixírlle-las indemnizacións económicas que sexan procedentes ós responsables da custodia e do manexo dos fondos públicos polos prexuízos que puidesen ocasionar, con independencia das demais responsabilidades de carácter civil, penal ou disciplinario en que puidesen incorrer (19).

(18) Artigos 47 desta lei para o principio de orzamento anual, 93 a 121 para o de control interno e de contabilidade, e 88 para o de unidade de caixa.

(19) Artigos 122 e seguintes desta lei.

Artigo 5º.- Reserva legal.

Regularanse por lei do Parlamento de Galicia as seguintes materias:

1. Os orzamentos xerais da Comunidade Autónoma e a concesión de créditos extraordinarios e suplementos de créditos da Xunta de Galicia e dos organismos autónomos nos termos recollidos nesta lei (20).
2. O establecemento, a modificación ou a supresión dos seus propios tributos e das exencións e bonificacións que os afecten (21).
3. O establecemento, a modificación e a supresión das recargas sobre os impostos do Estado (22).
4. A emisión e o réxime da débeda pública e demais operacións de crédito (23).
5. O réxime de patrimonio da Comunidade Autónoma (24).
6. A creación e supresión dos organismos autónomos nos termos que se prevén nesta lei (25).
7. Os convenios e acordos de cooperación con outras comunidades autónomas previstos no artigo 35 do Estatuto de autonomía.
8. O réxime e a concesión de avais e outras garantías pola Comunidade Autónoma (26).
9. A coordinación orzamentaria das deputacións provinciais de Galicia, en concordancia coa Lei 5/1997, do 22 de xullo, de Administración local de Galicia (27).
10. As demais materias relativas á Facenda pública galega que, segundo as leis, se deban regular con este rango.

(20) Artigos 52 e 62 da presente lei e 53.1 do Estatuto de Autonomía para Galicia, aprobado pola Lei Orgánica 1/1981, do 6 de abril (B.O.E. nº 101, do 28 de abril).

(21) Artigo 51 do Estatuto de Autonomía para Galicia.

(22) Artigo 51 do Estatuto de Autonomía para Galicia.

(23) Artigos 28 a 39 desta lei e 51 do Estatuto de Autonomía para Galicia.

(24) Artigo 43.2 do Estatuto de Autonomía para Galicia. O réxime do patrimonio da Comunidade Autónoma de Galicia está regulado pola Lei 3/1985, do 12 de abril (D.O.G. nº 78, do 24 de abril). (Véxase nota ó artigo 1.2.c) desta lei).

(25) Artigo 11 desta lei.

(26) Artigos 40 a 45 desta lei.

(27) Publicada no D.O.G. nº 149, do 5 de agosto, modificada pola Lei 8/1999, do 30 de decembro (D.O.G. nº 252, do 31 de decembro) e desenvolta pola Lei 4/2002, do 25 de xuño, do estatuto da capitalidade da cidade de Santiago de Compostela (D.O.G. nº 142, do 24 de xullo) e polos Decretos 280/1998, do 24 de setembro (D.O.G. nº 203, do 20 de outubro); 370/1998, do 10 de decembro (D.O.G. nº 4, do 8 de xaneiro de 1999) e 371/1998, do 10 de decembro (D.O.G. nº 4, do 8 de xaneiro de 1999). Véxase o artigo 53 da Lei.

Artigo 6º.- Competencia do Consello da Xunta.

Será competencia do Consello da Xunta (28) no marco das materias reguladas nesta lei:

1. A determinación das directrices básicas de política económica e financeira, de acordo co Estatuto de autonomía de Galicia.
2. A elaboración dos orzamentos xerais da Comunidade Autónoma.
3. A autorización dos gastos que segundo as leis requiran a súa aprobación.
4. A aprobación dos regulamentos para a súa aplicación.
5. Calquera outra que precise coñecemento ou aprobación da Xunta e a competencia da cal non lle estea reservada ó Parlamento de Galicia.

(28) Véxase o artigo 4 da Lei 1/1983, do 22 de febreiro, reguladora da Xunta e do seu Presidente (D.O.G. nº 23, do 21 de marzo), modificada pola Lei 11/1988, do 20 de outubro (D.O.G. nº 208, do 28 de outubro).

Artigo 7º.- Competencia da Consellería de Economía e Facenda.

Será competencia da Consellería de Economía e Facenda (29):

1. A administración, xestión e recadación dos dereitos da Facenda da Comunidade Autónoma (30).
2. A ordenación de pagamentos nos termos establecidos na presente lei (31).
3. A elaboración do anteproxecto de lei de orzamentos xerais da Comunidade Autónoma (32).
4. O control de eficacia e eficiencia respecto dos obxectivos previstos nos orzamentos xerais da Comunidade (33).
5. O exercicio directo das demais funcións de control interno reguladas nesta lei e a dirección e execución da contabilidade pública (34).
6. A execución ou dirección da política económica e financeira aprobada pola Xunta, na forma que esta determine.
7. O desenvolvemento das actividades inherentes ó exercicio da tutela financeira sobre os entes locais, que ten atribuída a Comunidade no artigo 49º do Estatuto de autonomía (35).
8. As funcións executivas en materia de ordenamento e control das institucións de crédito corporativo (36) público e territorial e das caixas de aforro que operen no seu territorio (37), nos termos previstos no artigo 30 do Estatuto de autonomía.
9. As demais funcións e competencias que lle asigne a normativa legal vixente.

(29) Véxase o Decreto 115/2004, do 3 de xuño, polo que se establece a estructura orgánica da Consellería de Economía e Facenda (D.O.G. nº 113, do 14 de xuño), modificado polo Decreto 247/2004, do 21 de outubro (D.O.G. nº 211, do 29 de outubro).

(30) Os artigos 45 e seguintes da Lei 11/1996, do 30 de decembro, de orzamentos xerais da Comunidade Autónoma de Galicia para 1997 (D.O.G. nº 254, do 31 de decembro) establecen normas sobre a xestión recadatoria, desenvoltos polo Decreto 51/2000, do 25 de febreiro, polo que se establece a organización recadatoria da Xunta de Galicia e o Estatuto dos recadadores de zona (D.O.G. nº 50, do 13 de marzo. Corrección de erros do texto en castelán no D.O.G. nº 56, do 21 de marzo).

(31) Artigos 74 e seguintes da presente lei.

(32) Artigo 51 da presente lei.

(33) Artigos 103 a 108 desta lei.

(34) Artigos 94 a 102 e 109 a 117 desta lei.

(35) Artigos 48 a 55 do Texto refundido da Lei reguladora das facendas locais, aprobado polo Real decreto lexislativo 2/2004, do 5 de marzo (B.O.E. nº 59 do 9 de marzo).

(36) Debe entenderse ”crédito cooperativo”. Téñase en conta o artigo 127 da Lei 5/1998, do 18 de decembro, de cooperativas de Galicia (D.O.G. nº 251, do 30 de decembro).

(37) Para este ámbito, véxanse a Lei 4/1996, do 31 de maio, de caixas de aforros de Galicia (CAG) (D.O.G. nº 117, do 14 de xuño), que mantén en vigor diversos artigos referidos ós órganos de goberno das CAG das Leis 7/1985, do 17 de xullo, e 6/1989, do 10 de maio (D.O.G. nº 137, do 18 de xullo, e nº 100, do 26 de maio, respectivamente) e que foi modificada pola Lei 1/2004, do 21 de abril (D.O.G. nº 77, do 22 de abril) e polo artigo 15 da Lei 14/2004, do 29 de decembro, de medidas tributarias e de réxime administrativo (D.O.G. nº 253, do 30 de decembro), así como o Decreto 77/1983, do 21 de abril, sobre dependencia orgánica e funcional das CAG (D.O.G. nº 42, do 3 de maio), derrogado no seu artigo 6.2 polo Decreto 271/1986, do 24 de xullo, sobre determinación de investimentos computables no coeficiente de investimento das CAG (D.O.G. nº 178, do 15 de setembro).
Téñanse en conta tamén o Decreto 153/1989, do 27 de xullo, dos órganos rectores das CAG (D.O.G. nº 148, do 3 de agosto), modificado polo Decreto 236/1996, do 14 de xuño (D.O.G. nº 118, do 17 de xuño), polo Decreto 180/2002, do 23 de maio (D.O.G. nº 100, do 27 de maio), e polo Decreto 276/2004, do 18 de novembro (D.O.G. nº 234, do 1 de decembro), así como o Decreto 240/1998, do 24 de xullo, polo que se regula a figura do Valedor do Cliente das Caixas de Aforros (D.O.G. nº 157, do 14 de agosto), o Decreto 270/1998, do 24 de setembro, polo que se desenvolve a organización e funcionamento da Oficina de Reclamacións de Clientes das caixas de aforros (D.O.G. nº 195, do 7 de outubro), o Decreto 261/1999, do 17 de setembro, polo que se desenvolve a regulación da obra benéfico-social das caixas de aforros galegas (D.O.G. nº 194, do 6 de outubro) e o Decreto 241/2000, do 29 de setembro, polo que se regula o procedemento sancionador aplicable ás caixas de aforro de Galicia.
Ó peche desta edición estase a tramitar un proxecto de decreto lexislativo polo que se aproba o Texto refundido das leis de caixas de aforros de Galicia, en virtude da autorización contida na disposición final segunda da Lei 1/2004, do 21 de abril (D.O.G. nº 77, do 22 de abril).

Artigo 8º.- Competencia das consellerías.

Será competencia das consellerías (38) :

1. A elaboración do seu anteproxecto de orzamento.
2. A administración e xestión dos créditos para gastos incluídos nos orzamentos e que estean adscritos a elas.
3. A autorización dos gastos propios da consellería, agás que aquela estea reservada ó Consello da Xunta.
4. A proposta do pagamento de obrigas á Consellería de Economía e Facenda.
5. As demais que lles confira a normativa legal vixente.

(38) Véxase o artigo 34 da Lei 1/1983, do 22 de febreiro, reguladora da Xunta e do seu Presidente (D.O.G. nº 23, do 21 de marzo), modificado polo art. 30 da Lei Lei 7/2002, do 27 de decembro, de medidas fiscais e de réxime administrativo (D.O.G. nº 251 do 30 de decembro) .

Artigo 9º.- Competencia dos organismos autónomos.

1. Son funcións dos organismos autónomos da Comunidade Autónoma no ámbito das súas respectivas competencias:
   1. A elaboración do seu anteproxecto de orzamentos de gastos e ingresos.
   2. A administración, xestión e recadación dos seus propios dereitos económicos.
   3. A autorización dos gastos contidos nos seus orzamentos e a ordenación dos seus pagamentos.
   4. As demais que lles atribúan as normas legais vixentes.
2. O previsto no número 1 anterior enténdese sen prexuízo do que puidese establecerse no uso do disposto no artigo 11º 2.

Artigo 10º.- Prerrogativas.

Á Comunidade Autónoma de Galicia, no exercicio das competencias ás que se refire esta lei, corresponderanlle en todo momento as mesmas prerrogativas e idéntico trato fiscal que a lei teña establecidos para o Estado (39).

(39) Téñanse en conta os artigos 77 e seguintes da Lei 58/2003, do 17 de decembro, xeral tributaria (B.O.E. nº 302, do 18 de decembro). Así mesmo, son de aplicación os artigos 33 a 43 do Regulamento xeral de recadación, aprobado polo Real Decreto 1684/1990, do 20 de decembro (B.O.E. nº 3, do 3 de xaneiro de 1991), modificado polo Real Decreto 448/1995, do 24 de marzo (B.O.E. nº 74, do 28 de marzo), polo Real Decreto 161/1997, do 7 de febreiro (B.O.E. nº 48, do 25 de febreiro), polo Real Decreto 111/2000, do 28 de xaneiro (B.O.E. nº 25, do 29 de xaneiro), polo Real Decreto 208/2002, do 22 de febreiro (B.O.E. nº 62, do 13 de marzo) e polo Real Decreto 1248/2003, do 3 de outubro (B.O.E. nº 247, do 15 de outubro).

Artigo 11º.- Organismos autónomos . (40)

1. Para o exercicio da actividade económico-financeira, a Comunidade Autónoma de Galicia, no seo da súa propia Administración pública, poderá crear organismos autónomos (41).
   Os organismos autónomos son entes institucionais de dereito público que realizan funcións ou actividades da competencia da Comunidade Autónoma en réxime de descentralización administrativa. Terán personalidade xurídica e patrimonio propios, independentes dos da Xunta de Galicia, e poderán ser de dúas clases:
   1. Organismos autónomos comerciais, industriais, financeiros ou análogos, que serán aqueles que realicen de forma principal actividades desta natureza ou calquera outra de carácter mercantil.
   2. Organismos autónomos administrativos, que serán todos aqueles nos que non concorra ningunha das circunstancias indicadas na alínea anterior.
2. A creación e supresión dos organismos autónomos realizarase por lei.
3. Ós organismos autónomos seranlles aplicables os preceptos desta lei e os demais que se dicten sobre materias non reguladas nela, e gozarán das prerrogativas e dos beneficios fiscais que se establezan nas leis para as entidades públicas de tal natureza (42).

(40) Artigos 9, 82, 93, 94, 106, 116 e 120 desta lei.

(41) Os organismos autónomos dependentes da Comunidade Autónoma de Galicia son os seguintes:

• De natureza comercial, o Instituto Galego da Vivenda e Solo (IGVS), creado pola Lei 3/1988, do 27 de abril (D.O.G. nº 88, do 10 de maio); o Instituto Galego de Artes Escénicas e Musicais (IGAEM), creado pola Lei 4/1989, do 21 de abril (D.O.G. nº 88, do 9 de maio); e o Fondo Galego de Garantía Agraria (FOGGA), creado pola Lei 7/1994, do 29 de decembro (D.O.G. nº 4, do 5 de xaneiro de 1995) coa denominación Instituto Lácteo e Gandeiro de Galicia (ILGGA), modificada pola disposición adicional quinta da Lei Lei 7/2002, do 27 de decembro, de medidas fiscais e de réxime administrativo (D.O.G. nº 251 do 30 de decembro).
• - De natureza administrativa, a Escola Galega de Administración Pública (EGAP), creada pola Lei 4/1987, do 27 de maio (D.O.G. nº 103, do 2 de xuño); o Instituto Galego de Estatística (IGE), creado pola Lei 9/1988, do 19 de xullo, de estatística de Galicia (D.O.G. nº 148, do 3 de agosto); o Servicio Galego da Saúde (SERGAS), creado pola Lei 1/1989, do 2 de xaneiro (D.O.G. nº 7, do 11 de xaneiro); a Academia Galega de Seguridade (AGS), creada pola Lei 4/1992, do 9 de abril (D.O.G. nº 76, do 22 de abril); o Servicio Galego de Promoción da Igualdade do Home e da Muller (SEGAPIHOM), creado pola Lei 3/1991, do 14 de xaneiro (D.O.G. nº 19, do 28 de xaneiro); o Instituto Galego de Consumo, creado pola Lei 8/1994, do 30 de decembro (D.O.G. nº 9, do 13 de xaneiro); e Augas de Galicia, creado pola Lei 8/1993, do 23 xuño, reguladora da Administración hidráulica de Galicia (D.O.G. nº 125, do 2 de xullo).

(42) O cerne do réxime normativo autonómico está nos artigos 44 a 46 da Lei 3/1985, do 12 de abril, do patrimonio da Comunidade Autónoma galega (D.O.G. nº 78, do 24 de abril) e nos artigos 106 a 110, 115 e 116 do seu Regulamento, aprobado polo Decreto 50/1989, do 9 de marzo (D.O.G. nº 71, do 13 de abril. Corrección de erros no D.O.G. nº 134, do 13 de xullo).
Véxanse tamén, como normativa supletoria, os capítulos I, II, IV e V do título III da Lei 6/1997, do 14 de abril, de organización e funcionamento da Administración Xeral do Estado (B.O.E. nº 90, do 15 de abril).

Artigo 12º.- Sociedades públicas autonómicas. (43)

1. Son sociedades públicas da Comunidade Autónoma de Galicia para os efectos desta lei:
   1. As sociedades mercantís no capital das cales exista participación maioritaria, directa ou indirecta, da Comunidade ou dos seus organismos autónomos e as demais entidades de dereito público da Comunidade Autónoma (44).
   2. As entidades de dereito público con personalidade xurídica propia que por lei teñan que adecua-la súa actividade ó ordenamento xurídico privado (45).
2. As sociedades públicas da Comunidade Autónoma de Galicia rexeranse polas normas de dereito mercantil, civil ou laboral, agás nas materias nas que lles sexa aplicable esta lei (46).
3. A creación das sociedades ás que se refire a letra a) do número 1 anterior, así como os actos de adquisición ou perda da posición maioritaria, medida esta nos termos indicados na dita letra, requirirán acordo do Consello da Xunta (47).
4. A actividade das sociedades públicas galegas coordinaraa a Administración da Facenda pública da Comunidade, nos termos previstos nas leis (48).

(43) Artigos 83 a 86, 93, 94, 106, 116 e disposición adicional primeira desta lei.

(44) A Lei 13/2004, do 29 de decembro, de orzamentos xerais da Comunidade Autónoma de Galicia para o ano 2005 (D.O.G. nº 253, do 30 de decembro), recolle as seguintes sociedades mercantís con participación pública maioritaria: TVG, S.A. e RTVG, S.A., integradas no orzamento do ente público Compañía de Radio-Televisión de Galicia; a Sociedade Galega de Medio Ambiente, S.A.; a Sociedade de Imaxe e Promoción Turística de Galicia, S.A.; Xestión Urbanística da Coruña, S.A.; Xestión Urbanística de Lugo, S.A.; Xestión Urbanística de Ourense, S.A.; Xestión Urbanística de Pontevedra, S.A.; S.A. de Xestión do Plan Xacobeo; S.A. de Xestión do Centro de Supercomputación de Galicia; S.A. para o Desenvolvemento Comarcal de Galicia; Instituto Galego de Medicina Técnica, S.A.; Galicia Calidade, S.A.; S.A. para o Desenvolvemento Industrial de Galicia; Centro Europeo de Empresas e Innovación de Galicia, S.A.; Sociedade Pública de Investimentos de Galicia, S.A.; Xenética Fontao, S.A.; Redes de Telecomunicación Galegas Retegal, S.A., Xesgalicia-Sociedade Xestora de Entidades de Capital-Risco, S.A. e a Sociedade Pública Autoestrada Alto de Santo Domingo-Ourense, S.A.
Debe terse en conta, ademais, a sociedade Servicios Agrarios Galegos, S.A., creada o 16 de abril de 1997 polo Consello de Dirección do ILGGA (actual FOGGA). Os seus estatutos aprobáronse polo Decreto 266/1997, do 18 de setembro (D.O.G. nº 188, do 30 de setembro).

(45) Deben terse en conta os capítulos I, III, IV e V do título III da Lei 6/1997, do 14 de abril, de organización e funcionamento da Administración Xeral do Estado (B.O.E. nº 90, do 15 de abril).
Os entes públicos que a Lei 13/2004 integra nos orzamentos para o ano 2005 son as seguintes: A Compañía de Radio-Televisión de Galicia (CRTVG), creada pola Lei 9/1984, do 11 de xullo (D.O.G. nº 148, do 3 de agosto); o Instituto Galego de Promoción Económica (IGAPE), creado pola Lei 5/1992, do 10 de xuño (D.O.G. nº 122, do 26 de xuño); a Fundación Pública Hospital de Verín, creada por acordo do Consello da Xunta do 23 de agosto de 1993; o ente público Portos de Galicia, creado pola Lei 5/1994, do 29 de novembro (D.O.G. nº 243, do 20 de decembro); a Empresa Pública de Obras e Servicios Hidráulicos, creada pola disposición adicional da Lei 8/1993, do 23 de xuño, reguladora da Administración hidráulica de Galicia (D.O.G. nº 125, do 2 de xullo); o Consello Económico e Social de Galicia, creado pola Lei 6/1995, do 28 de xuño (D.O.G. nº 133, do 12 de xullo); a Fundación Instituto Galego de Oftalmoloxía, creada polo acordo do Consello da Xunta do 2 de decembro de 1994; as fundacións Hospital Comarcal Virxe da Xunqueira e Hospital Comarcal A Barbanza; o Centro Informático para a Xestión Tributaria, Económico-Financeira e Contable, creado pola disposición adicional 5ª da Lei 2/1998, do 8 de abril, de medidas tributarias, de réxime orzamentario, función pública, patrimonio, organización e xestión (D.O.G. nº 68, do 9 de abril); a Fundación Pública Escola Galega de Administración Sanitaria, creada por acordo do Consello da Xunta do 19 de decembro de 1997; a Fundación Foro Permanente Galego-Iberoamericano da Saúde, creada por acordo do Consello da Xunta do 19 de decembro de 1997; a Fundación Pública Urxencias Sanitarias de Galicia (061), creada por acordo do Consello da Xunta do 27 de maio de 1999; o Instituto Enerxético de Galicia, creado pola Lei 3/1999, do 11 de marzo (D.O.G. nº 61, do 30 de marzo); a Fundación Pública Hospital Comarcal do Salnés; a Fundación Pública Cidade da Cultura de Galicia, creada por acordo do Consello da Xunta do 23 de decembro de 1999 e declarada de interese galego por Orde do 19 de xaneiro de 2000 (D.O.G. nº 26, do 8 de febreiro); a Axencia Galega de Desenvolvemento Rural, creada pola disposición adicional sexta da Lei 5/2000, do 28 de decembro, de medidas fiscais e de réxime orzamentario e adminsitrativo (D.O.G. nº 251, do 29 de decembro) e a Fundación Pública Centro de Transfusión de Galicia, creada pola Orde do 28 de maio de 1993 (D.O.G. nº 108, do 9 de xuño) e a Fundación Pública Galega de Medicina Xenómica, creada polo Decreto 451/2003, do 26 de decembro (D.O.G. nº 9, do 15 de xaneiro de 2004).
As fundacións públicas sanitarias constituídas pola Comunidade Autónoma transformaronse en fundacións de titularidade e natureza pública en virtude do disposto no Decreto 276/2001, do 27 de setembro, de adaptación das fundacións sanitarias á disposición adicional sétima da Lei 5/2000, do 28 de decembro, de medidas fiscais e de réxime orzamentario e administrativo (D.O.G. nº 208, do 26 de outubro).
Finalmente, a Axencia para a Xestión Integrada, Calidade e Avaliación da Formación Profesional foi creada como un ente de dereito público polo art. 37 da Lei 3/2002, do 29 de abril, de medidas de réxime fiscal e administrativo.

(46) Téñase en conta a Lei 10/1996, do 5 de novembro, de actuación de entes e empresas nas que ten participación maioritaria a Xunta de Galicia, en materia de persoal e contratación (D.O.G. nº 227, do 20 de novembro), modificada no seu artigo 9 pola disposición adicional cuarta da Lei 14/2004, do 29 de decembro, de medidas tributarias e de réxime administrativo (D.O.G. nº 253, do 30 de decembro) así como a nova redacción do apartado 1 do artigo 2 e das disposicións adicionais sexta e décimosexta da Lei de contratos das Administracións Públicas, introducida pola Lei 62/2003, do 30 de decembro (B.O.E. nº 313, do 31 de decembro).

(47) Para a súa creación aplícanse os artigos 44 a 47 da Lei 3/1985, do 12 de abril, do patrimonio da Comunidade Autónoma galega (D.O.G. nº 78, do 24 de abril) e os artigos 106, 107 e 111 a 116 do seu Regulamento, aprobado polo Decreto 50/1989, do 9 de marzo (D.O.G. nº 71, do 13 de abril. Corrección de erros no D.O.G. nº 134, do 13 de xullo).(Véxase nota ó artigo 1.2.c) desta lei).

(48) Neste ámbito deben terse en conta os artigos 46.2 da Lei 3/1985, do 12 de abril, e 114 e seguintes do seu Regulamento, citados en nota anterior.

Artigo 13º.- Convenios, acordos e transferencias.

1. Nos convenios con outras comunidades autónomas para a xestión e prestación de servicios da súa exclusiva competencia, e nos acordos de cooperación que se subscriban a teor do disposto nos números 1 e 2 do artigo 35º do Estatuto de autonomía, deberán establecerse as cláusulas precisas para asegurar en todo momento a aplicación desta lei no caso de que se proceda a comprometer recursos da Facenda pública galega para o seu desenvolvemento.
2. Nos casos en que, conforme o disposto no artigo 36 do Estatuto de autonomía, se lle transfiran ou deleguen á Comunidade Autónoma facultades e competencias non asumidas nel, que pola súa natureza dean orixe ó manexo e á distribución dos fondos públicos, seranlle aplicables á xestión financeira dos ditos fondos os preceptos desta lei, sen prexuízo das formas de control que reserve o Estado para si.

| |

TÍTULO I.
Do contido da Facenda da Comunidade (49)

CAPÍTULO I.
Dos recursos

(49) Con carácter xeral téñanse en conta os artigos 157 da Constitución e 42 a 55 do Estatuto de Autonomía para Galicia, aprobado pola Lei Orgánica 1/1981, do 6 de abril (B.O.E. nº 101, do 28 de abril). E tamén a Lei Orgánica 8/1980, do 22 de setembro, de Financiación das Comunidades Autónomas (B.O.E. nº 236, do 1 de outubro), modificada pola Lei Orgánica 1/1989, do 13 de abril (B.O.E. nº 90, do 15 de abril), pola Lei Orgánica 3/1996, do 27 de decembro (B.O.E. nº 313, do 28 de decembro) e pola Lei orgánica 7/2001, do 27 de decembro (B.O.E. nº 313, do 31 de decembro). Así mesmo, téñase en conta a Lei 21/2001, do 27 de decembro, pola que se regulan as medidas fiscais e administrativas do novo sistema de financiación das Comunidades Autónomas de réxime común e cidades con Estatuto de autonomía (B.O.E. nº 313, do 31 de decembro), modificada pola Lei 53/2002, do 30 de decembro, de medidas fiscais, administrativas e do orde social (B.O.E. nº 313, do 31 de decembro), pola Lei 47/2003, do 26 de novembro, xeral orzamentaria (B.O.E. nº 284, do 27 de novembro), e pola Lei 58/2003, do 17 de decembro, xeral tributaria (B.O.E. nº 302, do 18 de decembro).

Artigo 14º.- Recursos da Facenda autonómica.

Constitúen dereitos económicos da Facenda pública galega (50):

1. Os rendementos dos impostos, das taxas e das contribucións especiais que estableza a Comunidade Autónoma (51).
2. Os rendementos dos tributos cedidos polo Estado (52).
3. A participación nos ingresos do Estado por impostos directos e indirectos, incluídos os monopolios fiscais.
4. As dotacións para a nivelación dos servicios mínimos.
5. O importe dos prezos derivados dos servicios prestados pola Comunidade ou pola concesión de canons por aproveitamentos especiais, xa sexan de propia creación (53) ou como consecuencia de traspasos dos servicios estatais.
6. Os ingresos procedentes do Fondo de Compensación Interterritorial (54) ou doutros fondos de análoga natureza.
7. As recargas sobre impostos estatais.
8. Calquera outra asignación a favor da Comunidade Autónoma recollida nos orzamentos xerais do Estado ou nos doutros entes públicos.
9. O producto da emisión da débeda pública e do recurso ó crédito (55).
10. Os rendementos do patrimonio da Comunidade Autónoma (56).
11. Os legados, as doazóns e calquera outro ingreso de dereito privado (57).
12. O producto das multas e sancións impostas no ámbito da súa competencia (58).
13. Se é o caso, as participacións que establezan as leis nos ingresos por tributos do Estado para recupera-los custos sociais producidos por actividades contaminantes ou que deterioren o medio ambiente ou que xeren riscos de especial gravidade para o medio físico e humano de Galicia.
14. As subvencións que poida recibi-la Comunidade Autónoma.
15. Calquera outro recurso de dereito público ou privado que obteña ou lle corresponda á Comunidade Autónoma.

(50) Artigos 44 e 45 do Estatuto de Autonomía para Galicia.

(51) Os tributos da Comunidade Autónoma galega están regulados nas seguintes normas:

• En materia de xogo, na Lei 14/1985, do 23 de outubro, reguladora do xogo e apostas en Galicia (D.O.G. nº 222, do 20 de novembro), modificada pola Lei 3/2002, do 29 de abril, de medidas de réxime fiscal e administrativo e pola Lei Lei 7/2002, do 27 de decembro, de medidas fiscais e de réxime administrativo (D.O.G. nº 251 do 30 de decembro) e na Lei 7/1991, do 19 de xuño, de tributación sobre o xogo (D.O.G. nº 122, do 27 de xuño), que foi parcialmente derrogada pola Lei 2/1998, do 8 de abril, de medidas tributarias, de réxime orzamentario, función pública, patrimonio, organización e xestión (D.O.G. nº 68, do 9 de abril).
  A Orde do 30 de decembro de 2003 regula a presentación e o pagamento telemático da taxa fiscal sobre o xogo realizado a través de máquinas de xogo, tipo A especial, B ou C (D.O.G. nº 4 do 8 de xaneiro) e a Orde do 22 de decembro de 2004 modifica os prazos de ingreso da taxa fiscal sobre o xogo realizado a través de máquinas de xogo tipo A especial, B ou C e se aproba o modelo de declaración-liquidación da taxa fiscal sobre o xogo realizado en casinos (D.O.G. nº 252, do 29 de decembro).
• O canon de saneamento, na Lei 8/1993, do 23 de xuño, de Administración hidráulica de Galicia (D.O.G. nº 125, do 2 de xullo), modificada polas Leis 6/1994, do 29 de decembro (D.O.G. nº 251, do 30 de decembro), 1/1998, do 7 de abril (D.O.G. nº 68, do 9 de abril), 6/1998, do 29 de decembro (D.O.G. nº 252, do 31 de decembro), 7/1999, do 29 de decembro (D.O.G. nº 252, do 31 de decembro) e 6/2002, do 27 de decembro (D.O.G. nº 251, do 30 de decembro) de orzamentos xerais da Comunidade Autónoma de Galicia para 1995, 1998, 1999, 2000 e 2003, respectivamente; pola Lei 3/2002, do 29 de abril, de medidas de réxime fiscal e administrativo e pola Lei 7/2002, do 27 de decembro, de medidas fiscais e de réxime administrativo.
  A primeira lei citada está desenvolvida, en relación ó canon, polo Decreto 8/1999, do 21 de xaneiro (D.O.G. nº 20, do 1 de febreiro. Corrección de erros no D.O.G. nº 35, do 20 de febreiro), modificado polo Decreto 265/2000, do 26 de outubro (D.O.G. nº 218, do 10 de novembro).
• O imposto sobre a contaminación atmosférica, na Lei 12/1995, do 29 de decembro (D.O.G. nº 249, do 30 de decembro), modificada pola Lei 6/2002, do 27 de decembro, de orzamentos xerais da Comunidade Autónoma de Galicia para o ano 2003 (D.O.G. nº 251, do 30 de decembro) e desenvolvida polo Decreto 29/2000, do 20 de xaneiro, polo que se aproba o Regulamento do imposto sobre a contaminación atmosférica (D.O.G. nº 34, do 18 de febreiro. Corrección de erros no D.O.G. nº 67, do 5 de abril).
• As taxas, prezos e exaccións reguladoras, na Lei 6/2003, do 9 de decembro, de taxas, prezos e exaccións reguladoras da Comunidade Autónoma de Galicia (D.O.G. nº 240, do 11 de decembro).

(52) Téñanse en conta o artigo 157 da Constitución e a disposición adicional primeira do Estatuto de Autonomía para Galicia, modificada pola Lei 32/1997, do 4 de agosto, que se menciona máis abaixo.
Así mesmo, véxase a Lei 21/2001, do 27 de decembro, pola que se regulan as medidas fiscais e administrativas do novo sistema de financiación das Comunidades Autónomas de réxime común e cidades con Estatuto de autonomía (B.O.E. nº 313, do 31 de decembro), modificada pola Lei 51/2002, do 27 de decembro, de reforma da Lei 39/1988, reguladora das facendas locais (B.O.E. nº 311, do 28 de decembro), pola Lei 53/2002, do 30 de decembro, de medias fiscais, administrativas e da orde social (B.O.E. nº 313, do 31 de decembro), pola Lei 47/2003, do 26 de novembro, xeral orzamentaria (B.O.E. nº 284, do 27 de novembro), e pola Lei 58/2003, do 17 de decembro, xeral tributaria (B.O.E. nº 302, do 18 de decembro).
Deben destacarse tamén a Lei 18/2002, do 1 de xullo, do réxime de cesión de tributos do Estado á Comunidade Autónoma de Galicia e de fixación do alcance e condicións de dita cesión (B.O.E. nº 157, do 2 de xullo) e os artigos 2 e 3 da Lei 2/1998, do 8 de abril , de medidas tributarias, de réxime orzamentario, función pública, patrimonio, organización e xestión (D.O.G. nº 68, do 9 de abril). Este último artigo foi modificado pola Lei 7/1998, do 30 de decembro, de medidas tributarias, de réxime orzamentario, función pública e xestión (D.O.G. nº 252, do 31 de decembro), pola Lei 8/1999, do 30 de decembro, de medidas fiscais e orzamentarias e de función pública e actuación administrativa (D.O.G. nº 252, do 31 de decembro), pola Lei 5/2000, do 28 de decembro, de medidas fiscais e de réxime orzamentario e administrativo (D.O.G. nº 251, do 29 de decembro) e pola Lei 3/2002, do 29 de abril, de medidas de réxime fiscal e administrativo (D.O.G. nº 84, do 2 de maio), que a deroga parcialmente.

(53) Consúltese a nota ó artigo 14.1. Debe terse en conta a doutrina do Tribunal Constitucional sobre a fixación de prezos públicos polo uso privativo e o aproveitamento especial do dominio público, que prevé para ese caso a aplicación do principio de reserva legal, segundo a sentencia 185/1995, do 14 de decembro (B.O.E. nº 11, do 12 de xaneiro de 1996). Esta doutrina constitucional está xa recollida na vixente Lei 6/2003, do 9 de decembro, de taxas, prezos e exaccións reguladoras da Comunidade Autónoma de Galicia (D.O.G. nº 240, do 11 de decembro).

(54) Téñase en conta a Lei 22/2001, do 27 de decembro, reguladora dos Fondos de Compensación Interterritorial (B.O.E. nº 313, do 31 de decembro).

(55) Artigos 28 a 39 da presente lei.

(56) Véxanse o artigo 68 da Lei 3/1985, do 12 de abril, do patrimonio da Comunidade Autónoma Galega (D.O.G. nº 78, do 24 de abril) e o artigo 148 do seu Regulamento, aprobado polo Decreto 50/1989, do 9 de marzo (D.O.G. nº 71, do 13 de abril).

(57) En canto ós legados e doazóns, véxanse os artigos 858 a 891 e 618 a 658 do Código Civil. Así mesmo, os artigos 16, 17 e 23 da Lei 3/1985, do 12 de abril, do patrimonio da Comunidade Autónoma galega (D.O.G. nº 78, do 24 de abril) e os artigos 33, 34 e 38 do seu Regulamento, aprobado polo Decreto 50/1989, do 9 de marzo (D.O.G. nº 71, do 13 de abril. Corrección de erros no D.O.G. nº 134, do 13 de xullo). (Véxase nota ó artigo 1.2.c) desta lei).
En canto á sucesión intestada a favor da Comunidade Autónoma, consúltense os artigos 153 e 154 da Lei 4/1995, do 24 de maio, de dereito civil de Galicia (D.O.G. nº 107, do 6 de xuño), así como o Decreto 94/1999, do 25 de marzo, sobre réxime administrativo da sucesión intestada a favor da Comunidade Autónoma de Galicia (D.O.G. nº 73, do 19 de abril).

(58) Téñase en conta a Orde da Consellería de Economía e Facenda do 23 de novembro de 2001 pola que se regula o procedemento de recadación voluntaria e executiva das multas e sancións (D.O.G. nº 235, do 5 de decembro).

Artigo 15º.- Destino.

Os recursos da Comunidade Autónoma galega e de cada un dos seus organismos autónomos estarán destinados a satisface-lo conxunto das súas obrigas respectivas, salvo que por lei se estableza a súa afectación para fins determinados (59).

(59) Como exemplo desta afectación legal, véxanse o artigo 33.2 da Lei 8/1993, do 23 de xuño, reguladora da Administración hidráulica de Galicia (D.O.G. nº 125, do 2 de xullo), o artigo 4 da Lei 12/1995, do 29 de decembro, do imposto sobre a contaminación atmosférica (D.O.G. nº 249, do 30 de decembro), e o artigo 42 da Lei 8/1997, do 20 de agosto, de accesibilidade e supresión de barreiras na Comunidade Autónoma de Galicia (D.O.G. nº 116, do 29 de agosto).
Sobre esta cuestión téñase en conta o artigo 4 da Lei 6/2003, do 9 de decembro, de taxas, prezos e exaccións reguladoras da Comunidade Autónoma de Galicia (D.O.G. nº 240, do 11 de decembro).

Artigo 16º.- Administración dos recursos.

1. A administración xeral dos recursos da Facenda pública galega, así como a dirección e a coordinación xeral dos seus procedementos, correspóndenlle á Consellería de Economía e Facenda (60), cos controis que a lei estableza.
2. Na mesma forma, correspóndelles ós órganos rectores dos organismos autónomos e demais entes públicos con personalidade xurídica propia a administración dos recursos específicos que lles correspondan para o cumprimento dos seus fins.
3. As persoas ou entidades que teñan ó seu cargo a administración dos recursos da Facenda pública galega dependerán da Consellería de Economía e Facenda ou dos órganos de administración dos organismos autónomos, e demais entes públicos, en todo o relativo á súa xestión, aplicación e rendemento de contas.
4. Estarán obrigadas á prestación de fianza aquelas persoas ou entidades que manexen fondos ou valores públicos, na contía e forma que determinen as disposicións regulamentarias (61).

(60) Esta competencia xenérica tradúcese nas funcións encomendadas ós seus órganos de acordo co Decreto 115/2004, do 3 de xuño, polo que se establece a estructura orgánica da Consellería de Economía e Facenda (D.O.G. nº 113, do 14 de xuño), modificado polo Decreto 247/2004, do 21 de outubro (D.O.G. nº 211, do 29 de outubro).

(61) Por exemplo, artigo 34 do Decreto 51/2000, do 25 de febreiro, polo que se establece a organización recadatoria da Xunta de Galicia e o Estatuto dos recadadores de zona (D.O.G. nº 50, do 13 de marzo. Corrección de erros do texto en castelán no D.O.G. nº 56, do 21 de marzo).

Artigo 17º.- Xestión dos tributos.

1. A xestión, incluíndo tódalas fases do procedemento, dos tributos propios da Comunidade Autónoma, dos impostos cedidos e das recargas sobre impostos do Estado que poida establece-la Comunidade Autónoma axustarase:
   1. Ás disposicións do Estatuto de autonomía (62).
   2. Ó disposto na presente lei.
   3. Ás demais leis do Parlamento de Galicia.
   4. Ás disposicións regulamentarias aprobadas pola Xunta en desenvolvemento desta lei e demais leis citadas (63).
   5. Ás normas de desenvolvemento que as leis ou os regulamentos lle autoricen dictar ó conselleiro de Economía e Facenda (64).
   6. Á Lei xeral tributaria (65) e ás disposicións dictadas no seu desenvolvemento, coa consideración de dereito supletorio nos casos nos que sexa preceptiva a súa aplicación.
2. Na xestión dos tributos cedidos polo Estado terase en conta ademais o que dispoña a correspondente normativa (66).

(62) Artigo 54 do Estatuto de Autonomía para Galicia.

(63) Téñanse en conta o Decreto 172/1992, do 26 de xuño, polo que se dictan normas para a xestión, liquidación e recadación das taxas e prezos públicos da Comunidade Autónoma de Galicia (D.O.G. nº 124, do 30 de xuño. Corrección de erros no D.O.G. nº 136, do 15 de xullo), así como o Decreto 51/2000, do 25 de febreiro, polo que se establece a organización recadatoria da Xunta de Galicia e o Estatuto dos recadadores de zona (D.O.G. nº 50, do 13 de marzo. Corrección de erros do texto en castelán no D.O.G. nº 56, do 21 de marzo).
Non obstante, ó peche desta edición estase a tramitar un novo decreto polo que se ditan as normas para a aplicación das taxas e prezos da Comunidade Autónoma de Galicia, que derrogará o mencionado Decreto 172/1992, do 26 de xuño.

(64) Consúltese a Orde da Consellería de Economía e Facenda do 29 de xuño de 1994 pola que se regula o procedemento de recadación voluntaria das taxas e prezos da Comunidade Autónoma de Galicia (D.O.G. nº 145, do 29 de xullo), modificada polas Ordes da Consellería de Economía e Facenda do 2 de abril de 1997 (D.O.G. nº 72, do 16 de abril) e do 24 de marzo de 1998 (D.O.G. nº 68, do 9 de abril). Os anexos I e II actualizáronse coa Resolución da Dirección Xeral de Tributos do 3 de abril de 2003 (D.O.G. nº 78, do 23 de abril).
Polo que se refire á recadación en vía executiva, véxase a Orde da Consellería de Economía e Facenda do 8 de outubro de 1997 (D.O.G. nº 205, do 23 de outubro).
En canto ós tributos cedidos, hai que contar coa Orde da Consellería de Economía e Facenda do 13 de xaneiro de 1993 pola que se dictan normas relativas á encomenda de funcións tributarias ás oficinas liquidadoras de distrito hipotecario (D.O.G. nº 14, do 22 de xaneiro), modificada no seu artigo 2º pola Orde do 4 de febreiro de 1998 (D.O.G. nº 31, do 16 de febreiro). Así mesmo, a Orde do 5 de xuño de 2003 regula o procedemento para o pagamento e a presentación telemáticos das autoliquidacións correspondentes ó imposto sobre transmisións patrimoniais e actos xurídicos documentados, pola transmisión de determinados medios de transporte usados entre particulares (D.O.G. nº 116, do 17 de xuño) e a Orde do 30 de abril de 2004 regula ese mesmo procedemento con carácter xeral (D.O.G. nº 90 do 11 de maio).
Por último, respecto da inspección deben destacarse a Orde da Consellería de Economía e Facenda do 5 de febreiro de 1997 pola que se desenvolve o Regulamento xeral da inspección de tributos no ámbito da competencia da Dirección Xeral de Tributos (D.O.G. nº 33, do 18 de febreiro), así como a Resolución do 12 de febreiro de 1999 da Dirección Xeral de Tributos pola que se aproban os modelos de actas da Inspección da Facenda da Xunta de Galicia (D.O.G. nº 38, do 24 de febreiro).

(65) Lei 58/2003, do 17 de decembro, xeral tributaria (B.O.E. nº 302, do 18 de decembro).

(66) Véxase nota ó artigo 14.2.

Artigo 18º.- Dispoñibilidade de bens e dereitos.

1. A xestión dos bens patrimoniais e dos seus rendementos, tanto da Comunidade Autónoma coma dos seus organismos autónomos, axustarase ó disposto nas leis do Parlamento de Galicia aplicables en cada caso (67).
2. Non poderán ser alleados, gravados nin arrendados os dereitos da Facenda da Comunidade Autónoma, salvo nos supostos e nas condicións previstas nas leis (68).
3. Tampouco se concederán exencións, condonacións, rebaixas nin moratorias no pagamento dos dereitos a favor da Facenda pública galega, salvo nos casos e na forma que se determinen nas leis.

(67) Téñanse en conta os artigos 60 a 68 da Lei 3/1985, do 12 de abril, do patrimonio da Comunidade Autónoma galega (D.O.G. nº 78, do 24 de abril), modificada pola Lei 2/1998, do 8 de abril, de medidas tributarias, de réxime orzamentario, función pública, patrimonio, organización e xestión (D.O.G. nº 68, do 9 de abril), e artigos 138 a 148 do seu regulamento, aprobado polo Decreto 50/1989, do 9 de marzo (D.O.G. nº 71, do 13 de abril. Corrección de erros no D.O.G. nº 134, do 13 de xullo de 1989), modificado polo Decreto 238/1998, do 24 de xullo (